Memleket qarjysyn jymqyrǵan mektep dırektoryna qatysty sot úkimi shyqty

TALDYQORǴAN. KAZINFORM - Jetisý oblysynda Sarqan aýdandyq soty mektep dırektoryna qatysty (QK 189-babynyń 3-bóligi 2-tarmaǵy ) qylmystyq isti qarady. Aıyptalýshy ómirboıyna memlekettik qyzmetten shettetildi.

Sarqan aýdandyq sotynyń dereginshe, 2024 jyldyń 1-shi naýryzynan bastap mektep dırektory R-dy kitaphanashy jáne memlekettik mekemeniń menedjeri laýazymyna taǵaıyndaǵan. Naýryzdan maýsym aıyna deıin R. menedjerligi úshin alatyn 40 myń teńge eńbekaqysyn B.-nyń kelininiń shotyna aýdaryp otyrǵan. Al bul qarajatty B. óz qajetine jumsaǵan.

- Іsti qaraý barysynda aýdan prokýrory men aıyptalýshy arasynda, jábirlenýshi ókiliniń kelisimimen, QR QPK 616-baby tártibinde kináni moıyndaý týraly protsessýaldyq kelisim jasaldy. Sot prokýror usynǵan jaza túri men kólemin, aıyptalýshynyń jeke basyn, keltirilgen zalaldyń ótelgenin, jábirlenýshi ókiliniń jazanyń mólsherine qatysty pikirin eskere otyryp, B.-ny QK 189-babynyń 3-bóligi 2-tarmaǵynda kózdelgen qylmystyq quqyqbuzýshylyqty jasaǵany úshin kináli dep tanyp, oǵan urlanǵan múlik qunynyń 10 ese mólsherinde 1 900 000 teńge kóleminde aıyppul salý jáne memlekettik qyzmette qyzmet atqarý quqyǵynan ómir boıyna aıyrý jazasyn taǵaıyndady. Úkim zańdy kúshine engen joq, - dedi Sarqan aýdandyq soty.

Eske salaıyq osyǵan deıin Taldyqorǵanda jarylǵysh zat qoıyldy dep jalǵan aqpar bergen azamattyń 2 jyl 6 aıǵa sottalǵanyn jazǵanbyz.