Memleket qant qyzylshasyn ósirýge sýbsıdııalardy kóbeıtedi

ASTANA. QazAqparat - Kelesi jyldan bastap qaıta óńdeýge tapsyrylǵan qant qyzylshasy tonnasynyń qunyn sýbsıdııalaý normasyn 15-ten 25 myń teńgege deıin ulǵaıýynyń arqasynda 40 myń teńgeni quraıtyn bolady, dep habarlaıdy QazAqparat Aýyl sharýashylyǵy mınıstrliginiń baspasóz qyzmetine silteme jasap.

Aýyl sharýashylyǵy vıtse-mınıstri Ábilqaıyr Tamabektiń Jetisý oblysynyń qyzylsha ósiretin sharýashylyq basshylary jáne dıhandarmen kezdesýinde qant salasyna memlekettik qoldaýdy kúsheıtý týraly aıtyldy.

Atap aıtqanda, sharýashylyqtardyń qant qyzylshasyn ósirýge jumsaǵan shyǵyndary jyl saıyn ósip otyratyny jáne bıylǵy jyly 1 gektarǵa jumsalǵan shyǵyndar 900 myńnan 1 mln teńgege deıin jetkeni atap ótildi.

Qyzylsha ósirýshilerdiń memlekettik qoldaý tásilderin qaıta qaraý jónindegi ótinishterin eskere otyryp, Aýyl sharýashylyǵy mınıstrligi sýbsıdııalar normalaryn ulǵaıtty. Osylaısha shıkizatty qabyldaý qunyn burynǵy 30 myń teńgeniń ornyna 40 myń teńgege jetkizdi. Sonyń arqasynda qant qyzylshasynyń rentabeldiligi júgeri, raps jáne soıa sııaqty daqyldardyń deńgeıine deıin teńestiriledi.

Sondaı-aq Aýyl sharýashylyǵy vıtse-mınıstri memleket qyzylsha ósirýshilerge qoldaý kórsetýdi jalǵastyratynyn, qant salasyn damytý jónindegi jospar ázirlengenin atap ótti.

Qaıta óńdeýge tapsyrylǵan qant qyzylshasyn sýbsıdııalaýdy ulǵaıtýǵa kelesi jyly shamamen 11,5 mlrd teńge bıýdjet qarajatyn bólý josparlanyp otyr. Sondaı-aq, búginde tuqym, gerbıtsıdter, tyńaıtqyshtar qunynyń 50%, tehnıka qunynyń 25% sýbsıdııalanady, bul rette sýbsıdııalaýdyń jańa qaǵıdalarynda tehnıkanyń ruqsat etilgen eń joǵary qunynyń belgilengen lımıtterin ózektendirý josparlanyp otyr.

«Budan bólek, memlekettik qoldaý sharalaryn jetildirý boıynsha jumys sheńberinde qyzylsha jınaıtyn kombaındardy satyp alýǵa óteý normatıvin 50% deıin ulǵaıtý máselesi pysyqtalyp jatyr. Memlekettik qoldaýdyń jańa erejeleri 2023 jyldan bastap kúshine enedi dep kútilip otyr», - dedi Ábilqaıyr Tamabek

Kezdesýde sharýalar qant salasyn damytý perspektıvalary týraly óz pikirlerimen bólisip, túsimniń, ıaǵnı paıdanyń ósýine tikeleı yqpal etetin agrotehnologııalardy saqtaýdyń mańyzdylyǵyn atap ótti.

Qant salasyn damytýdyń 2026 jylǵa deıingi keshendi josparyn iske asyrý aıasynda egis alqaptaryn 38 myń gektarǵa deıin ulǵaıtý josparlanyp otyr.

Foto: QR Aýyl sharýashylyǵy mınıstrligi