Memleket qandaı jaǵdaıda shetelde emdeý shyǵynyn ótep beredi
«Qazaqstanda qoldanylmaıtyn joǵary tehnologııaly emdeý ádisterin talap etetin syrqat kezinde naýqasty arnaıy komıssııa sheteldik medıtsınalyq uıymdarǵa jiberýi múmkin. Bul másele «Qazaqstan Respýblıkasy azamattaryn bıýdjet qarajaty esebinen shetelde emdeý úshin baǵyttaý erejelerin bekitý týraly» №554 buıryqpen retteledi», - delingen qordyń baspasóz qyzmetiniń habarlamasynda.
Basym jaǵdaıda sheteldik emhanalarda emdelýge kelesi sanattaǵy azamattar jiberiledi:
- organ transplantatsııasyn júrgizýge muqtaj patsıentter;
- aıaǵy aýyr áıelder;
- balalar;
- mindetin atqarý kezinde aýyr jaraqat alǵan áskerı qyzmetkerler men quqyqqorǵaý organdarynyń qyzmetkerleri;
Balalar men kútimge muqtaj adamdar sheteldik emhanalarǵa kútip baǵatyn adamymen birge barady.
Kóliktik shyǵyndar bıýdjet esebinen óteledi.
Qazaqstan azamattary bıýdjet qarajaty esebinen emdelýge baǵyttalatyn aýrýlardyń túrleri:
- radıohırýrgııalyq emdeý ádisin talap etetin arterıovenozdy malformatsııalar nemese isikter (gamma-pyshaq);
- endovaskýlıarly em jasaý úshin bas mıy baǵanasy tamyrlarynyń jáne julyn mıy tamyrlarynyń arterıovenozdy malformatsııasy, sondaı-aq arterıaldy anevrızm kezinde;
- bas súıektegi isikti transoraldy ádispen alyp tastaý;
- radıohırýrgııalyq emdeý ádisin talap etetin qaterli kóz aýrýlary (gamma-pyshaq, radıoaktıvti applıkatorlar);
- keratoprotezdeý;
- júrek, búırek, baýyr, ókpe, jilik maıyn transplantatsııalaýdy talap etetin aýrýlar kezinde;
- kómeı stenozy;
- keńirdek stenozy.
Shetelde emdelýge ótinim berý úshin kelesi qujattardy tapsyrý qajet:
- jeke kýáliktiń kóshirmesi;
- patsıentti sheteldik medıtsınalyq uıymǵa joldaý kerektigi týraly oblystyq densaýlyq saqtaý basqarmasynyń ótinish haty;
- zertteý nátıjeleri jazylǵan naýqastyń aýrý tarıhynan kóshirme;
- shetelde emdeý qajettigi týraly medıtsınalyq qorytyndy.
«Sheshimdi Densaýlyq saqtaý mınıstrliginiń arnaıy komıssııasy qabyldaıdy. Onyń quramyna mınıstrliktiń, úkimettik emes uıymdardyń músheleri men dárigerler kiredi. Bul rette, memlekettik bıýdjet sheteldik medıtsınalyq uıymǵa ózdigimen júgingenderdiń shyǵynyn ótemeıdi», - dep eskertedi qordan.