Memleket ınvestorlar aldyndaǵy mindettemelerin tolyq oryndaýy kerek — Prezıdent

ASTANA. KAZINFORM — Úkimet Qazaqstannyń ınvestıtsııalyq áleýetin kóterýge basa mán bergeni jón. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

— Meniń shetelge saparlarym jáne ınvestorlarmen kezdesýlerim barysynda qol jetkizilgen kelisimderdiń oryndalýyna basa mán berý qajet. Kommertsııalyq kelisimderdiń jalpy quny byltyrdyń ózinde shamamen 75 mıllıard dollar boldy. Jumysty sozbalańǵa salý jáne qol qoıylǵan kelisimderdi oryndamaý degen másele bolmaýy tıis. Bul jumysty oryndaýǵa Prezıdent Ákimshiligi de jaýapty. Ashyǵyn aıtý kerek, bizde mynadaı jaǵymsyz úrdis paıda boldy: joǵary basshylyq deńgeıindegi kelissózderdiń aldynda óte belsendi jumys júrgiziledi, al keıin tym-tyrys bolyp qalady. Mekemeler arasyndaǵy bitpeıtin ózara kelisý áreketin doǵarý kerek. Úkimet meılinshe derbes bolýdy surady, derbestik berildi, endi is júzinde sony durys qoldanýy kerek, — dedi Qasym-Jomart Toqaev.

Prezıdenttiń aıtýynsha, qol qoıylǵan árbir qujat aldyn ala sapaly túrde daıyndalyp, oryndalý merzimderi naqty aıqyndalýy qajet. Jumystyń nátıjesi úshin birinshi basshylarǵa jeke jaýapkershilik júkteledi.

— Memleket ınvestorlar aldyndaǵy mindettemelerin tolyq oryndaýy kerek. Elge senim, iskerlik bedel osylaı qalyptasady. Úkimet Qazaqstannyń ınvestıtsııalyq áleýetin kóterýge, básekelik artyqshylyqtaryn damytýǵa basa mán bergeni jón, — dedi Memleket basshysy.

Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.