Memleket halyq aldyndaǵy áleýmettik mindettemelerin tolyq oryndaıdy – Májilis tóraǵasy
«Búgin barlyǵymyz Prezıdenttiń kezekti Joldaýyn tyńdadyq. Bul Joldaý asa erekshe boldy dep aıtar edim. Ol buryn bastalǵan reformalardyń logıkalyq jalǵasy bolyp otyr. Óte mańyzdy, elimizdiń bolashaq damýyna, taǵdyryna qatysty aýqymdy máseleler kóterildi. Eń bastysy, Memleket basshysy Joldaýda alǵash ret bolashaq saılaý naýqandarynyń kestesin jarııalap, elimizdiń búkil saıası júıesiniń jańaryp-jańǵyrýyna jol ashyp berdi. Bul bıliktiń ashyqtyǵyn jáne memleket pen qoǵam arasyndaǵy senimniń nyǵaıýyn aıqyn kórsetedi. Sonymen birge, Prezıdent eń ózekti máselelerge toqtalyp, olardy sheshý joldaryn usyndy», - dedi E. Qoshanov Májilistiń jalpy otyrysynda.
Osy oraıda ol Prezıdent Joldaýda aıtqan barlyq máseleler qoǵam suranysyna saı keletinin aıtty.
«Qazir qazaqstandyqtardy tolǵandyratyn eń basty másele – ekonomıkanyń damýy, halyqtyń ál-aýqatyn arttyrý. Eldi baǵa men tarıfterdiń ósýi alańdatyp otyr. Prezıdent Joldaýda kóptiń kókeıinde júrgen osy suraqtarǵa naqty jaýap berdi. Ol «Azamat – bıznes – memleket» arasyndaǵy qatynasty túbegeıli ózgertýdi usyndy. Onyń basty maqsaty – bıznes ashyp, kásipkerlikpen aınalysý úshin teń múmkindikter jasaý, ekonomıkalyq erkindikti qoldaý, memlekettiń ekonomıkaǵa shekten tys aralasýynan bas tartý. Sonymen birge, salyq jáne bıýdjet júıesin jańǵyrtýǵa, bıýdjet qarajatynyń tıimdiligin arttyrýǵa, memlekettik-jekemenshik áriptestik pen memlekettik satyp alý mehanızmderin jetildirýge, otandyq bıznes úshin nesıe resýrstarynyń tapshylyǵy máselesin sheshýge erekshe basymdyq berilip otyr. Qazirgi álemdegi kúrdeli ahýalǵa qaramastan, memleket halyq aldyndaǵy áleýmettik mindettemelerin tolyq oryndaıdy jáne arttyrady», - dedi Májilis tóraǵasy.
Onyń aıtýynsha, Májilis depýtattary aldynda konstıtýtsııalyq reformalar aıasynda da birqatar zańdy qabyldaý mindeti tur.
«Osy sessııada depýtattar jumys isteıtin zań jobalarynyń erekshe mańyzy bar jáne ony qoǵam da kútip otyr. Sondyqtan, olardy qaraý kezinde halyqtyń, azamattyq qoǵam ókilderi men sarapshylardyń pikiri meılinshe eskerilýi tıis.
Jumys toptarynyń otyrystary, zań jobalardyń tanystyrylymy sııaqty barlyq jıyndarǵa jurtshylyqtyń keńinen qatysýyn qamtamasyz etý qajet», - dedi E. Qoshanov.
Foto: www.parlam.kz
