Memleket halyqtyń 15 sanaty úshin medıtsınalyq saqtandyrý jarnasyn tóleıdi
ASTANA.KAZINFORM — 2026 jyldan bastap turmysy tómen azamattar medıtsınalyq saqtandyrý júıesimen qamtylady. Al oǵan qarajat jergilikti bıýdjet esebinen bólinbek. Búginde memleket halyqtyń 15 sanaty úshin saqtandyrý jarnalaryn tóleıdi. Tizimge endi tabysy tómen azamattar da qosylyp otyr.
Elimizde Mindetti áleýmettik medıtsınalyq saqtandyrý júıesi 2020 jylǵy 1 qańtardan bastap qoldanylyp keledi. Ony engizýdiń arqasynda densaýlyq saqtaý salasyn qarjylandyrý 2,5 eseden astamǵa ósken.
Qazaqstandyqtar MÁMS-tegi mártebesiniń bar-joǵyna qaramastan onkoskrınıngten aqysyz óte alady. Bul qyzmet túri tegin medıtsınalyq kepildendirilgen kómek kórsetý paketi aıasynda qoljetimdi.
— Densaýlyq saqtaý mınıstrliginiń buıryǵymen eldegi alǵashqy sanıtarııalyq-medıtsınalyq kómek kórsetý uıymdary «dárigerge jazylý» memlekettik qyzmetin kórsetedi. Bul qyzmet arqyly adamdar dárigerge jazyla alady. Prezıdent óz Joldaýynda densaýlyq saqtaý salasyn tsıfrlandyrý týraly aıtty. Osy baǵytta qor basshylyǵy mobıldik qosymshany jańartyp jatyr. 2026 jyldan bastap turǵyndar «Qoldaý 24/7» mobıldi qosymshasy arqyly dárigerge jazyla alady, alǵan medıtsınaldyq qyzmetteri men dári-dármek tizimin, MÁMS-tegi saqtandyrý mártebesin kóre alady, — dedi Áleýmettik medıtsınalyq saqtandyrý qorynyń zańdy jáne jeke tulǵalarmen jumys departamentiniń aǵa menedjeri Shapaǵat Imanǵalı Jibek Joly telearnasynyń «BÚGІN. Live» baǵdarlamasynda.
Onyń aıtýynsha, elimizde adamdardyń medıtsınalyq qyzmetke qoljetimdigi — negizgi qaǵıdattardyń biri. Shuǵyl jaǵdaılarda turǵyndar beıindi mamandarǵa joldamasyz tikeleı júgine alady. Densaýlyq poıyzdaryna da dáriger joldamasy qajet emes.
Buǵan deıin Densaýlyq saqtaý mınıstri Aqmaral Álnazarova MÁMS júıesiniń basty nátıjelerin ataǵan edi.
Sonymen birge, dárigerge sırek qaralatyn adamdardyń medıtsınalyq tarıfi 20 paıyz qysqarady.