Memleket ǵylymı protsesti emes, ekonomıkalyq nátıjege qol jetkizýdi qarjylandyrýǵa tıis - Smaıylov
ASTANA. KAZINFORM – Bıyl ǵylym salasynda júrgizilgen aýdıt qorytyndysy boıynsha 51 mlrd teńgege qarjylyq buzýshylyqtar anyqtaldy. Bul týraly Quryltaı otyrysynda Joǵary aýdıtorlyq palata tóraǵasy Álıhan Smaıylov aıtty.
- Konstıtýtsııada ǵylymdy strategııalyq basymdyq retinde belgileý basqarýdyń jańa logıkasyn talap etedi. Memleket ǵylymı protsestiń ózine emes, el úshin tehnologııalyq jáne ekonomıkalyq nátıjege qol jetkizýdi qarjylandyrýǵa tıis. Atalǵan problemalar boıynsha Úkimetke tıisti usynymdar, jaýapty memlekettik organdarǵa tapsyrmalar berildi. Joǵary aýdıtorlyq palata aldaǵy ýaqytta da osy baǵyttaǵy jumystyń ilgerileýin júıeli túrde qadaǵalap otyrady, - dedi ol.
Palata tóraǵasynyń aıtýynsha, bıyl ǵylym salasynda júrgizilgen aýdıt qorytyndysy boıynsha 51 mlrd teńgege qarjylyq buzýshylyqtar, 47 mlrd teńgege qarajattyń tıimsiz josparlanǵany jáne paıdalanylǵany, 16 mlrd teńgege shyǵyn jáne jiberip alǵan paıda faktileri anyqtaldy.
- 36 fakt boıynsha materıaldar ákimshilik isti qozǵaý úshin ókiletti organdarǵa jiberildi, 3 fakt boıynsha aýdıt materıaldaryn quqyq qorǵaý organdaryna jiberý jóninde sheshim qabyldandy. Osy jylǵy aýdıt qorytyndysy boıynsha Úkimetke 5 usynym jáne aýdıt obektilerine 66 tapsyrma berildi, - dedi Álıhan Smaıylov.
Buǵan deıin ǵylymı zertteýlerge jáne tájirıbelik-konstrýktorlyq jumystarǵa arnalǵan qarajat tolyq ǵylymǵa baǵyttalmaıtynyn jazǵan edik.
