Memleket ǵalymdardyń eńbegin joǵary baǵalaıdy jáne qoldaý kórsete beredi – Prezıdent
Bul týraly Memleket basshysy búgin Ǵylym jáne tehnologııalar jónindegi ulttyq keńestiń birinshi otyrysynda aıtty, dep habarlaıdy QazAqparat.
Jıyn barysynda Prezıdent jınalǵandardy Ǵylym kúnimen quttyqtady.
«Ǵylym jolynda júrgen azamattarǵa shynaıy rızashylyǵymdy bildiremin. Memleket ǵalymdardyń eńbegin joǵary baǵalaıdy jáne qoldaý kórsete beredi. Biz búgin birinshi otyrysty ótkizdik. Alda taǵy kóptegen kezdesý bolady. Meniń usynysym mynadaı: biz ǵylymnyń damýyna baılanysty eń ózekti máselelerdi basymdyq (ıaǵnı prıorıtet) retinde osy qurammen talqylap, tıisti sheshimderdi qabyldaýymyz kerek. Árıne, memlekettiń qarjylyq múmkindigi sheksiz emes, biz «kórpege qaraı kósilýimiz kerek». Sondyqtan Akademııa basshylyǵy memleket basshylyǵyna ǵylymnyń negizgi basymdyqtaryn usynýy qajet. Bul – óte mańyzdy jumys»,-dedi Memleket basshysy.
Sondaı-aq Prezıdent Kúnsulý Daltonqyzy Zakarıany Qazaqstan Respýblıkasy Ǵylym akademııasynyń prezıdenti laýazymyna taǵaıyndaǵanyn jetkizdi.
«Kúnsulý Zakarıa – kórnekti ǵalym, bıologııa ǵylymdarynyń doktory, álemdik ǵylym qoǵamdastyǵyna tanymal professor, otandyq «QazVac» vaktsınasynyń avtory, Memlekettik syılyqtyń laýreaty. Pandemııa kezinde Qazaqstannyń densaýlyq saqtaý júıesin kúsheıtýge zor úles qosty. Uıymdastyrý qabileti joǵary. Sonymen qatar Ǵylym akademııasynyń burynǵy prezıdenti, kórnekti ǵalym Murat Jurynuly Jurynovqa qajyrly eńbegi úshin taǵy da alǵysymdy aıtamyn. Barshańyzǵa amandyq tileımin! Jumystaryńyz jemisti bolsyn!»,-dedi Qasym-Jomart Toqaev.
Keńes otyrysynda Ulttyq ǵylym akademııasynyń akademıgi Asqar Jumadildaev, Ulttyq ǵylym akademııasynyń prezıdenti Kúnsulý Zakarıa, Pýrdý (AQSh) ýnıversıteti ıAdrolyq energetıka mektebiniń professory Zınetola Eńsepov, Ulttyq ǵylym akademııasynyń akademıgi Jáken Taımaǵambetov, Gýstav Rozı (Frantsııa) ınstıtýtynyń dırektory ári dotsenti Murat Saparbaev, «Ekonomıka ınstıtýtynyń» Jahandaný jáne halyqaralyq yntymaqtastyq bóliminiń bas ǵylymı qyzmetkeri Orazaly Sábden, Aýstrııa ǵylym jáne tehnologııa ınstıtýtynyń dotsenti Jánibek Álpeıishev jáne Los-Alamos ulttyq zerthanasynyń (AQSh) ǵylymı qyzmetkeri, tehnıka ǵylymdarynyń kandıdaty Dııar Talbaev sóz sóıledi.
