Memleket eshkimdi baspanasyz, dalada qaldyrmaıdy - Úkimet basshysy
AQTÓBE. KAZINFORM – Aqtóbe oblysynda Qazaqstan Premer-Mınıstri Oljas Bektenovtiń tóraǵalyǵymen selektorlik rejımde óńirlik shtab basshylarynyń qatysýymen Sý tasqynyna qarsy is-sharalardy úılestirý jáne sý tasqynynyń saldaryn joıý jónindegi respýblıkalyq shtabtyń otyrysy ótti.
Búgingi tańda elimizde sý tasqynyna baılanysty kúrdeli ahýal qalyptasyp otyr. Toǵyz óńirde jergilikti aýqymdaǵy TJ rejımi jarııalandy (Abaı, Aqmola, Aqtóbe, Atyraý, BQO, Qaraǵandy, Qostanaı, Pavlodar, Ulytaý). Sý tasqyny bastalǵannan beri sý basqan aımaqtardan barlyǵy 19 myńnan astam adam evakýatsııalandy.
Shtab basshysynyń orynbasary Qanat Bozymbaevtyń esebi tyńdaldy. Boljamǵa sáıkes, jaqyn arada búkil el boıynsha jaýyn-shashyn bolyp, kún kúrt jylynady dep kútilýde. Qardyń tez erýinen sý qoımalary tolýda. Búgingi tańda soltústik, shyǵys jáne ortalyq aımaqtardyń 65%-dan astamy áli kúnge deıin qalyń qar astynda. Sondyqtan aldaǵy ýaqytta sý tasqyny qaýpi bar óńirlerde aldyn alý sharalary kúsheıtildi, TJM-niń qajetti kúshteri men quraldary daıyndaldy.
Qarjy mınıstri Mádı Takıev Memleket basshysynyń tapsyrmalaryn iske asyrý aıasynda sý tasqyny saldarynan sharýashylyq qyzmeti buzylǵan jeke kásipkerler men shaǵyn jáne orta bıznes sýbektileriniń barlyǵyna berilgen ótinishine saı nesıeler boıynsha tólemderdi keıinge qaldyrý usynylatynyn baıandady. Sondaı-aq Qarjy mınıstrligi sý tasqynynan zardap shekken bıznes sýbektileri úshin salyq eseptiligin tapsyrý jáne salyqtardy tóleýdi keıinge qaldyrýdy usynady.
Sonymen qatar otyrysqa bıznes-qoǵamdastyq ókilderi qatysyp, sý tasqynynan zardap shekken ınfraqurylymdy qalpyna keltirýge memleketke járdemdesýge daıyn ekenderin málimdedi.
Óz kezeginde Oljas Bektenov barlyq óńirde ákimdikterdiń ótinishi boıynsha sý tasqynyna qarsy jumystarǵa qajetti tehnıka men materıaldardy tegin bergen qurylys kompanııalaryna, jol jóndeıtin uıymdarǵa Úkimettiń atynan alǵys aıtty.
Otyrys qorytyndysy boıynsha Premer-Mınıstr jóndeýge jaramdy turǵyn úıler men ınfraqurylymnyń sapasyna erekshe nazar aýdarý qajet ekenin atap ótti.
«Memleket basshysynyń tapsyrmasy boıynsha sý basqan úılerdiń barlyǵy qujattardyń bar-joǵyna qaramastan, qalpyna keltiriletin bolady. Memleket eshkimdi baspanasyz, dalada qaldyrmaıdy. Osyndaı qıyn jaǵdaıda iri, orta bıznes, sondaı-aq kishigirim kompanııalar jáne eldiń taǵdyryna beı-jaı qaramaıtyn qarapaıym azamattar qol ushyn sozyp jatyr. Bıýdjet qarajatyna qosymsha turǵyn úılerdi qalpyna keltirýge, joǵalǵan múlik pen mal shyǵynyn óteýge baǵyttalatyn qomaqty soma jınaldy. Merdiger kompanııalar osyndaı qıyn jaǵdaıdy bızneske aınaldyrmaıdy jáne barlyq qarajat maqsatty túrde jumsalady dep senemin», - dedi Shtab jetekshisi.
Fermerler men aýyl sharýashylyǵy janýarlarynyń ıelerine erekshe nazar aýdaryldy. 33 myńnan astam mal basy qaýipsiz jerlerge kóshirildi. Oǵan qosa maldyń ólim-jitimi bar. Aýyl sharýashylyǵy mınıstrligi shyǵyndy óteý máselesin sheshýde.
«Úkimet fermerler men mal ıelerine nesıeler men lızıngtik mindettemelerdi keıinge shegerý boıynsha qoldaý kórsetetin bolady. Tólemder keshiktirilgen jaǵdaıda aıyppul salynbaıdy», - dedi Premer-Mınıstr.
Sonymen qatar Shtab otyrysynda tasqyn kezeńine aldyn ala daıyndalǵan óńirlerdiń bar ekeni, sondyqtan sý tasqynynyń saldary sonshalyqty joıqyn bolmaǵany atap ótildi. Máselen, Qaraǵandy oblysynda aýqymdy sýdyń kólemine qaramastan, eldi mekenderdi jappaı sý alyp ketken joq. 6-7 jyl buryn aýyldardyń aınalasynda bógetter salynyp, sýdy buratyn aryqtar qazylǵan. Munyń barlyǵy – ýaqtyly qabyldanǵan qarapaıym sheshimder. Ol óz tıimdiligin dáleldedi.
Sondyqtan árbir eldi meken boıynsha osy jyldyń kúzine deıin joıqyn sý tasqynynyń aldyn alý úshin qajetti sharalardy qabyldaý tapsyryldy. Ákimderdiń esepteri Úkimet otyrystarynda turaqty túrde tyńdalatyn bolady.
Sonymen qatar oblys ákimdiginde Oljas Bektenov Ahýaldyq ortalyqqa bardy. Ahýaldyq ortalyqtyń operatorlary – «109» qysqa nómiri boıynsha táýlik boıy jumys isteıtin Call-ortalyq arqyly halyqpen baılanysta. 109 ahýaldyq ortalyǵyna sý tasqynyna qarsy is-qımyl bastalǵannan beri 15 myńnan astam qońyraý tústi. 12 293 ótinim tirkeldi. Ahýaldyq ortalyq kúsheıtilgen rejımde jumys istep jatyr, oǵan TJ jáne sý tasqynyna qarsy shtab qyzmetteri qosylǵan.
