Memleket esebinen baıyǵandar urlanǵan qarajatty shetelde paıdalana almaýy kerek - Qojamjarov
ASTANA. QazAqparat - Búgin Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov Sybaılas jemqorlyqqa qarsy is-qımyl Ulttyq bıýrosy jáne onyń aýmaqtyq bólimsheleriniń jeke quramynyń qatysýymen májilis ótkizdi, dep habarlaıdy vedomstvonyń baspasóz qyzmeti.
Onda Qaırat Qojamjarov Sybaılas jemqorlyqqa qarsy qyzmet ofıtserlerine Memleket basshysynyń 20 qarashada kezdesý barysynda bergen tapsyrmalaryn jetkizdi.
«Bizdiń mindet - qoǵam ómiriniń barlyq salalarynda jemqorlyqpen tıimdi kúresýdi qamtamasyz etý. Ol áleýmettik, aýylsharýashylyq, qurylys máseleleri, ken ıgerý, qarjy jáne kvazımemlekettik sektorlar, quqyqqorǵaý, sot organdary jáne basqa da salalar» - dedi
Q. Qojamjarov.
Sondaı-aq, tóraǵa sybaılas jemqorlyqqa qarsy qyzmettiń tıimdi jumys atqarýyna qajetti jaǵdaı men quraldar bar ekenin atap ótti.
Basym mindetterge qylmystyq tizbektiń barlyq quramyn, ıaǵnı oryndaýshydan uıymdastyrýshyǵa deıin áshkereleý qoıyldy.
«Elbasy sybaılas jemqorlyqqa qarsy qyzmetke jemqoryq kórinisterin kim jasasa da, onymen qatal kúresýdi mindet etip qoıdy» - dedi Q. Qojamjarov.
Memlekettiń ekonomıkalyq qaýipsizdigin qamtamasyz etýge erekshe kóńil bólindi.
Osy baǵytta Ulttyq bıýroǵa bıýdjet qarajatynyń maqsatty jumsalýyna baqylaýdy kúsheıtý tapsyryldy.
«Aıypty tulǵalardyń múligine tyıym salý jáne sheteldegi zańsyz aktıvterin anyqtaý arqyly Memlekettiń urlanǵan qarajatyn tolyǵymen óndirýdi qamtamasyz etý kerek. Memleket esebinen zańsyz baıyǵan birde-bir tulǵa urlanǵan qarajatty ne Qazaqstanda, ne shetelde paıdalanýǵa múmkindigi bolmaýy kerek», - dep kórsetti Tóraǵa.
