Memleket eń kúrdeli kezeńderde otandyq qarjy sektoryn qoldap otyrdy – Qasym-Jomart Toqaev
NUR-SULTAN. QazAqparat – Otandyq qarjy júıesi óz turaqtylyǵyn aýyr ekonomıkalyq daǵdarys kezeńderinde birneshe ret dáleldedi. Bul týraly Qazaqstan Prezıdenti Qasym-Jomart Toqaev Qazaqstan qarjygerleriniń IX kongresine joldaǵan beınequttyqtaýynda aıtty, dep habarlaıdy QazAqparat tilshisi.
«Ótken jyldyń basynda koronavırýs pandemııasy men onyń saldary álemdik ekonomıkaǵa sonshalyqty quldyratatynyn áser tıgizetinin boljamdaǵan adamdar az boldy. Odan keıingi naryqtardyń qulaýy – sońǵy 100 jylda oryn alǵan eń mańyzdy oqıǵaǵa aınaldy. Memlekettik jáne halyqaralyq ınstıtýttar qabyldaǵan aıryqsha sharalar jalpy jaǵdaıdyń budan keıingi nasharlaýyn toqtatýǵa múmkindik berdi. Alaıda shıkizat, saýda jáne qarjy salalaryndaǵy belgisizdik áli de saqtalýda», - dedi Prezıdent.
Onyń aıtýynsha, jahandyq táýekelder men úrdisterdi eskere otyryp, qarjy salasyn birtindep damytý – memleket basymdyqtarynyń biri bolyp otyr. Bul rette onyń basty mindeti – elimizdiń ekonomıkalyq ósýin qoldaý bolyp qala beredi.
«Memleket eń kúrdeli kezeńderde otandyq qarjy sektoryn árdaıym qoldap otyrdy. Osynyń arqasynda búginde bankter aıtarlyqtaı turaqty jáne ekonomıkany kredıtteý úshin úlken áleýetke ıe. Sondyqtan olar ekonomıkany serpindi qalpyna keltirýdiń jáne ony ártaraptandyrýdyń basty qozǵaltqyshy rólin óz moınyna alýǵa mindetti», - dep atap ótti Qasym-Jomart Toqaev.
Prezıdenttiń aıtýynsha, ekonomıkany qarjylandyrýdyń taǵy bir mańyzdy resýrsy bola alatyn otandyq qor naryǵyn, onyń ishinde «Astana» halyqaralyq qarjy ortalyǵyn belsendi damytý qajet.
«Qazirgi kezeńde jahandyq qarjy ınstıtýttarynyń jasyl baǵytyna, qarjy qyzmetterin tereń tsıfrlandyrýǵa baılanysty syn-qaterlerdi de eskergen jón. Bul máseleler baıypty talqylaýdy jáne balanstalǵan sheshim izdeýdi qajet etedi. Osy baǵyttardy tıimdi damytý elimizdiń básekege qabilettiligin kúsheıtý úshin qosymsha múmkindikter ashady. Qoryta kelgende, memlekettik organdardyń, retteýshiler men qarjy ınstıtýttarynyń aldynda ortaq bir mindet tur – ol halqymyzdyń ál -aýqatyn arttyrý. Búgingi jıyn elimizdiń qarjy salasyn nyǵaıta túsý úshin tıimdi sharalar ázirleýge septigin tıgizedi dep senemin. Qarjy júıesi qyzmetkerleriniń kásibı merekesi qutty bolsyn! Kongress jumysyna tabys tileımin», - dedi Qazaqstan Prezıdenti.
Aıta keteıik, Qazaqstan qarjygerleriniń kongresi – Qazaqstandaǵy qarjy sektoryn damytýǵa baılanysty ózekti máselelerdi talqylaýǵa arnalǵan platforma. Bıyl qarjygerler kongresi onlaın formatta ótip jatyr.
