Memleket eksporttaýshylardy qoldaıdy
Ol el ekonomıkasyn turaqtandyrý úshin Qazaqstan Úkimeti daǵdarysqa qarsy birqatar jedel is-sharalardy júzege asyratynyn jetkizdi. «Munaı-gaz sektoryndaǵy shıkizat óndirý deńgeıin tómendetýge jol bermeý maqsatynda biz elimizdegi barlyq 57 munaı, gaz óndiretin kompanııalarǵa tereń taldaý júrgizdik. Sonyń nátıjesinde 39 tabysy tómen kompanııalardy iriktep aldyq. Aǵymdaǵy jyldyń 1 qazanynan bastap bul kompanııalarǵa salyq tóleýde jeńildik beriledi, atap aıtqanda, paıdaly qazbalardy óndirýge salynatyn salyq mólsheri tómendetiledi. Mundaı jeńildik atalǵan kompanııalar tobyna salynatyn fıskaldyq júktemeni 8 paıyzǵa azaıtýǵa múmkindik beredi, aqshamen eseptegende bul 46 mlrd. teńgeni quraıdy»,- dep habarlady B. Saǵyntaev.
El Úkimetiniń munaıgaz óndirýshilerdi qoldaý maqsatynda shyǵarǵan sheshiminiń biri - munaı-gaz óndiretin kompanııalarǵa ilespe gazdy qosymsha jaǵýǵa ruqsat berýi. Mundaı qadam munaıshylarǵa munaı óndirý kólemin 480 myń tonnaǵa deıin ulǵaıtýǵa jol ashady, al budan memleket bıýdjetine 19 mlrd. teńge túsim túsedi. Sonymen qatar, el Úkimeti ken-metallýrgııalyq sektor men hımııa ónerkásibin qoldaý úshin, elektr qýaty men magıstraldyq temirjol jelileriniń qyzmetine tólenetin tarıfti tómendetý joldaryn qarastyrýda. Osyǵan oraı, iriktep alynǵan 90 kompanııa boıynsha tarıf tómendetý sharalary Úkimettiń ekonomıkalyq blogynyń jumys tobynda qarastyrylady.
«Bul jerde negizinen, qara metallýrgııa men hımııa ónerkásibi kompanııalaryna nazar aýdarylady. Atap aıtqanda, aǵymdaǵy jyldyń 1 qazanyna deıin osy sektordaǵy kompanııalarǵa salyqtyq jeńildikter beremiz. Alaıda, sonymen qatar osy kompanııalarǵa óndiris kólemi men jumys oryndaryn saqtaýǵa qatań talap qoıylady»,- dep habarlady Premer-Mınıstrdiń birinshi orynbasary. Otandyq metallýrgııalyq jáne altyn ónerkásibimen aınalysatyn kompanııalardy shıkizatpen qamtamasyz etý maqsatynda 2015 jyldyń 1 qyrkúıeginen bastap elmizdiń aýmaǵynan qara metaldar men quramynda altyny bar metaldardy tasymaldaýǵa tyıym salynady.
Daǵdarysqa qarsy is-sharalar eń aldymen, eksportqa taýar shyǵaratyn óńdeý ónerkásibindegi kompanııalarǵa jaǵymdy áser etkeni belgili. 2015 jyldyń basynda bul maqsatqa el Úkimeti 35 mlrd. teńge bóldi. Osy qarajatty ıgergen kompanııalar qazirgi kezde TMD-nyń barlyq memleketteriniń (Reseı, Ózbekstan, Ázerbaıjan jáne t.b.) naryǵyna kondıterlik ónimder, teplovozdar jáne t.b. taýarlardy shyǵara bastady. - Qazaqstandyq ónimderge degen suranysty eskere otyryp, biz qazir eksportty qoldaýǵa qosymsha qarajat bólemiz, sóıtip, bul salany yntalandyrý kólemi 50 mlrd. teńgege jetedi. Jalpy aıtqanda, biz bıylǵy jyldyń sońyna deıin eksporttaýshy kompanııalarǵa 186 mlrd. teńgege jýyq aqsha bólemiz,- dedi B. Saǵyntaev. Qoryta aıtqanda, mundaı qoldaý otandyq eksportaýshy kompanııalardyń eńsesin kóterdi. Olardyń keıbireýi jyldyń sońyna deıin óndiris kólemin ulǵaıtýdy oılastyrýda. Eń bastysy, jumys oryndary saqtalyp qalady.
Ámirlan Álimjan
