Memleket EKO-ǵa alǵashynda 100 kvota ǵana bólgen edi – Mádına Nurǵalıeva

NUR-SULTAN. QazAqparat – Qazaqstannyń ekstrakorporaldy uryqtandyrý tehnologııasy AQSh, Eýropa tehnologııasynan kem emes. Mundaı pikirdi QR Prezıdenti janyndaǵy Qazaqstannyń strategııalyq zertteýler ınstıtýty dırektorynyń keńesshisi Mádına Nurǵalıeva Aqparat jáne qoǵamdyq damý mınıstrligi uıymdastyrǵan QR Prezıdenti Joldaýy aıasyndaǵy áleýmettik basymdyqtardy talqylaýǵa arnalǵan dóńgelek ústel otyrysynda aıtty, dep habarlaıdy QazAqparat tilshisi.

«Prezıdent Joldaýy keshe báriniń aýzynda júrgeni sózsiz. Alda áli talaı kópten jaıttar men detaldaryn tereńirek talqylaıtyn bolamyz. Búgingi baǵdar Joldaýda aıtylǵan áleýmettik basymdyqtar bolǵandyqtan menińshe, eń mańyzdy sanalatyn otbasylyq saıasat, balalar, áleýmettik-demografııalyq máseleler jaıyna toqtalǵym keledi. Áleýmettik jelilerdegi pikirlerdi sholyp otyryp, 2021 jyldan ekstrakorporaldy uryqtandyrý baǵdarlamasy boıynsha kvota sanyn arttyrýǵa qatysty bastamanyń barynsha qoldaýǵa ıe bolǵandyǵyn baıqap qaldym», - dedi ol.

Onyń aıtýynsha, Eýropalyq adam reprodýktsııasy qaýymdastyǵynyń deregine sáıkes, 1 mln turǵynǵa ekstrakorporaldy uryqtandyrý baǵdarlamasy 1-1,5 myń kvota qoldanylýy tıis. Qazaqstanda bul kórsetkish 1 myń kvotaǵa teń.

«Qazaqstan bul taqyryppen 20 jyl boıy aınalysyp keledi jáne bizde birinshi ekstrakorporaldy uryqtandyrý 2010 jyly jasaldy. Sol kezde memleket ekstrakorporaldy uryqtandyrý boıynsha 100 kvotaǵa ǵana aqsha bólgen edi. Osy aralyqta elimizde kóptegen sábı dúnıege kelip, kóptegen otbasy óziniń mártebesin nyǵaıtty», - dedi ol.

Ol bul baǵyttaǵy qazaqstandyq tehnologııanyń Eýropa elderi, AQSh, Ońtústik-Shyǵys Azııa elderi tehnologııasynan kem emestigin basa aıtty.

«20 jyldyń ishinde bizge 51 elden bedeýligi bar patsıentter kelip emdeldi. 18 mln halqymyzǵa EKO baǵdarlamasynyń munan da kóp kvotasy qajet. Memleket basshysynyń bul kórsetkishti arttyrý týraly keshegi tapsyrmasy qazaqstandyq otbasylar úshin máseleniń qanshalyqty mańyzdy ekendigin kórsetip otyr», - dedi Mádına Nurǵalıeva.

Eske salaıyq, Prezıdent Qasym-Jomart Toqaev 1 qyrkúıek kúni jarııalaǵan Joldaýynda EKO boıynsha kvotany 7 myńǵa deıin arttyrýdy tapsyrdy.