Memleket daǵdarys kezinde BAQ-tarǵa jaqsy qoldaý bildirip otyr - S.Mataev
ALMATY. Jeltoqsannyń 7-si. QazAqparat /Erbol Azanbek/ - Daǵdarys kezeńinde memlekettiń BAQ-tardyń menshik nemese ustanǵan baǵytyna qaramaı memlekettik tapsyrys berýi otandyq BAQ-tarǵa úlken kómek bolyp otyr. Bul týraly búgin Almatyda «Qazaqstandyq BAQ jáne tulǵanyń quqyǵy men erkindigin qorǵaý» taqyrybynda ótken ǵylymı-tájirıbelik konferentsııa barysynda QR Jýrnalıster odaǵynyń tóraǵasy Seıitqazy Mataev aıtty,
dep habarlaıdy QazAqparat.
Onyń aıtýynsha, Qazaqstandaǵy BAQ-tardyń jaǵdaıy Ortalyq Azııa elderimen salystyrǵanda aıtarlyqtaı jaqsy. Eldegi BAQ-tardyń 90 paıyzy jekemenshik jáne básekege qabiletti naryqta ómir súredi. «Bul óte jaqsy kórsetkish. Alaıda, jýrnalıster quqyǵynyń buzylýy jıi kezdesedi. Bul baǵytta BAQ týraly zańdylyqtardy jetildire túsý qajet», dep atap ótti S.Mataev.
QR Mádenıet jáne aqparat mınıstrligi Aqparat jáne muraǵat komıteti tóraǵasynyń orynbasary Larısa Brovataıanyń aıtýynsha, memleket tarapynan kóbinese BAQ-tardaǵy áleýmettik mańyzdy taqyryptar qarjylandyrylady. «Jalpy memlekettik tapsyrys boıynsha qarjylandyrý BAQ-tarǵa daǵdarys ýaqytynda úlken kómek bolyp otyrǵany daýsyz. Bul baǵytta memlekettik qarjylandyrý ulǵaıyp keledi. Mysaly, 2007 jyly 48 BAQ memlekettik tapsyrys arqyly qarjylandyrylsa, qazirgi kezde olardyń sany 128-ge jetti», deıdi L. Brovataıa.
