Memleket buqaralyq jáne kásibı sporttyń damýyna qolaıly jaǵdaı jasaıdy – Prezıdent
ASTANA. KAZINFORM – Memleket basshysy Qasym-Jomart Toqaev XXV Qysqy Olımpıada oıyndarynyń chempıony Mıhaıl Shaıdorovty marapattaý rásimi barysynda sóılegen sózinde mememleket tarapynan buqaralyq jáne kásibı sporttyń damýyna qolaıly jaǵdaı jasalatynyn aıtty, dep habarlaıdy Aqordanyń baspaóz qyzmeti.
Bul – memlekettik saıasattyń basym baǵyty.
– Olımpıadadaǵy nátıje árqashan el damýynyń mańyzdy kórsetkishteriniń biri sanalǵan, aldaǵy ýaqytta da solaı bola bermek. Qazaqstan osy jarystarǵa qatysqan sportshylardyń sany jaǵynan 25-orynǵa taban tiredi. Biz aldyna maqsat qoıǵan ár eńbekqor jan óziniń qabilet-qarymyn kórsete alatyn, sonyń ishinde sportta kózdegen bıigine jetýi úshin mol múmkindikke jol ashatyn Ádiletti Qazaqstandy quryp jatyrmyz. Adal báseke, merıtokratııa, tártip pen jaýapkershilik, bul – úlken sporttyń da, kez kelgen qýatty memlekettiń de dińgegi. Ulttyń jasampazdyq qýatyn arttyrý respýblıkalyq referendýmǵa shyǵarylǵan jańa halyqtyq Konstıtýtsııa jobasynyń negizgi mazmundyq ózegi bolyp otyr. Ata Zańdaǵy ádildik, tártipke baǵyný, tabıǵatty aıalaý, otanshyldyq qaǵıdattary memleket irgesin bekemdep, órkendeýdiń qozǵaýshy kúshine aınalady, – dedi Memleket basshysy.
Prezıdenttiń pikirinshe, memleketterdiń damýy da úlken sportqa uqsas: kim aldyna bıik maqsat qoıady, tabandy eńbek etedi, birlesip jumys isteıdi, sol jetistikke jetedi.
– Búgin biz jeńiske jetýge bar kúsh-jigerin jumsap, jeke rekordtaryn jańartqan Mıhaıl men ulttyq qurama múshelerin quttyqtaımyz. Keıbir sportshylarymyz osyndaı aýqymdaǵy jarysqa alǵash ret qatyssa da, olar laıyqty óner kórsetti. Kóptegen sportshymyz ózderi synǵa túsken saıysta úzdik ondyqqa endi. Bul bolashaqtaǵy tabystarǵa jol ashady. Azamattarymyzdyń halyqaralyq deńgeıdegi jetistikteri, meıli, ol sportta nemese oqýshylar men stýdentter olımpıadasynda, ónerde, tipti basqa salalarda bolsyn, elimizdiń órkendep kele jatqanyn kórsetedi. Taıaýda Mılan men Kortınada Qysqy Paralımpıada oıyndary bastalady. Sportshylarymyzǵa sáttilik tileımin, – dedi Qasym-Jomart Toqaev.
Memleket basshysy sózin qorytyndylaı kele, eki jyldan keıin atletterimiz Los-Andjeleste ótetin Jazǵy Olımpıada oıyndaryna qatysatynyn eske saldy.
– Týrızm jáne sport mınıstrligi, Ulttyq Olımpıada komıteti, federatsııalar birlese jumys atqaryp, qurama múshelerin jan-jaqty qoldaýǵa tıis. 2029 jyly Almaty qalasynda ótetin Qysqy Azııa oıyndaryna erekshe nazar aýdarý qajet. Oıyndar eń joǵary deńgeıde uıymdastyrylýy kerek. Bul – Qazaqstandaǵy sporttyń damýyna tyń serpin berip, ekonomıka men týrızm salalaryna oń yqpal etetin óte mańyzdy is-shara, – dedi Qasym-Jomart Toqaev.
Osyǵan deıin Memleket basshysy XXV Qysqy Olımpıada oıyndarynyń chempıony Mıhaıl Shaıdorovty marapattaǵany týraly jazdyq.
