Memleket bıznestiń «qaltasyna» qol suǵýmen áýestenip ketti — Jaqsybek Qulekeev
ASTANA. KAZINFORM — Belgili ekonomıst, «QazMunaıGaz» ulttyq kompanııasy tóraǵasynyń keńesshisi Jaqsybek Qulekeev Májilistiń Salyq kodeksin talqylaýǵa arnalǵan jumys tobynyń otyrysynda Úkimet bıýdjet tártibin saqtamaýdy ádetke aınaldyrǵanyn synady.
— Qorqýdyń keregi joq. Adamdar salyqtyń joǵary ekenine shaǵym aıtady. Óıtkeni báz bireýler salyq tólemeı otyr. Eger elde salyq salý saıasaty ádiletti bolsa, bárine birdeı júkteme artsa, eshkim eshteńege shaǵymdanbaıdy. Sondaı-aq, biz túrli jaǵdaılardyń áserinen bıýdjet tártibin tómen túsirip jibergenimiz sonsha, ásirese byltyr aldyńǵy jyldarmen salystyrǵanda 5 ese az salyq jınadyq. Onyń obektıvti de, sýbektıvti de sebepteri bar. Bıyl da solaı jumys istesek, aldaǵy birneshe jylda eldi qurtyp tynamyz, — dedi ol.
Sarapshy ekonomıkadaǵy jeke ınvestıtsııanyń úlesi azaıyp ketkenine alańdaıtynyn da aıtty.
— Biz bıznesmenderdiń qaltasyna zańdy jolmen de, zańsyz jolmen de qol salýmen áýestenip kettik. Olar da buǵan shydaı bermeıdi. Byltyr ekonomıkaǵa salynǵan jeke ınvestıtsııanyń ósimi 1,7 paıyz boldy. onyń aldyndaǵy jyldarda keminde 10 paıyzdan asatyn. Investıtsııa bolmasa, bolashaq ta joq. Sondyqtan Salyq kodeksi degen óte salmaqty qujat. Ony óte muqııat tarazylap qana pysyqtaý kerek. Onyń ústine bul qabyldaǵaly otyrǵan qujat aldaǵy 10 jyldaǵy jaǵdaıymyzdy aıqyndaıdy, — dedi Jaqsybek Qulekeev.
Eske salsaq, 20 aqpanda Májiliske Salyq kodeksiniń túzetilgen jobasy engizilgen edi. Búgin sol qujatty pysyqtaıtyn Májilistiń jumys toby iske kiristi.
Kodekstiń jańa redaktsııasyndaǵy negizgi túzetýler mynalar:
➤ Qosylǵan qun salyǵy boıynsha mindetti tirkeý shegin tómendetý — 20 000 AEK (78,6 mln teńge) 3 800 AEK (15 mln teńge) deıin;
➤ Qosylǵan qun salyǵynyń mólsherlemesin arttyrý — 12%-dan 16%-ǵa deıin, buǵan qosa birqatar sala úshin tómendetilgen mólsherleme 10% belgilenedi;
➤ Jeńildetilgen deklaratsııa boıynsha arnaıy salyq rejımin qoldanýdy shekteý — tek B2C segmentine (bıznes túpkilikti tutynýshylar úshin) qoljetimdi bolady.
Aıta ketelik belgili ekonomıst Almas Chýkın Májilistiń Salyq kodeksin talqylaýǵa arnalǵan jumys tobynyń otyrysynda salyq reformasyn keshiktirýge bolmaıtynyn málim etken edi.