Memleket bıznesti qoldaý sharalaryn keńeıtedi —Asqar Mamın
Importty almastyrý jáne «qarapaıym zattar ekonomıkasy» salalaryn damytý boıynsha jobalardy iske asyrý jumystarynyń barysy týraly QR Premer-Mınıstriniń orynbasary R. Sklıar jáne «Atameken» UKP basqarma tóraǵasy A. Myrzahmetov, kásipkerlik áleýetti damytý jáne turǵyndardyń tabysyn kóterý maqsatynda óńirlerge skrınıng júrgizý qorytyndysy týraly «Atameken» UKP basqarma tóraǵasynyń birinshi orynbasary E. Jumaǵazıev baıandady. Sonymen qatar QR bıznes qaýymdastyǵynyń ókilderi túsinik berdi.
Ótken aıda «Qarapaıym zattar ekonomıkasy» jobalyq ofısine 130-dan asa jańa joba kelip tústi, 1 trln teńgege jýyq somaǵa 227 joba pysyqtalyp jatyr. Usynylǵan bastamalar boıynsha kósh basynda Qyzylorda, Jambyl, Shyǵys Qazaqstan oblystary. Artta qalǵandar – Atyraý, Almaty, Soltústik Qazaqstan oblystary.
Salalar bólinisinde jobalar sany boıynsha mashına jasaý (55 joba), azyq-túlik ónerkásibi (37) jáne AÓK (35) kósh basynda. Bul rette somasy joǵary jobalar hımııa ónerkásibinde (324 mlrd teńgege) jáne qurylys materıaldary óndirisinde (116 mlrd teńgege) baıqalyp otyr.
«Atameken» UKP ótkizgen óńirler skrınıngi 2,2 mln úı sharýashylyǵyn (10 mln turǵyn) jáne 788 myń kásipkerlik sýbektisin qamtydy. Skrınıng nátıjeleri kásiporyndardyń kadrlyq qajettiligin (105 myńnan asa adam), kásipkerlik negizderine oqytylýǵa daıyn belsendi turǵyndar sanyn (153 myńnan asa adam) jáne basqa da parametrlerdi anyqtaýǵa múmkindik berdi.
Vedomstvoaralyq komıssııa jergilikti óndiris kólemin arttyrý, qosymsha jumys oryndaryn ashý jáne turǵyndardyń tabysyn arttyrý úshin óńirler skrınıngi qorytyndysyn is júzine asyrý maqsatynda ákimdikterdiń «Atameken» UKP-men birlesip óńir ákiminiń orynbasarynan tómen emes deńgeıde jobalyq ofıs qurý týraly sheshim qabyldady.
VAK ımportty almastyrý boıynsha jobalardy irikteý reglamentin bekitti. Atap aıtqanda, AÓK jáne óńdeý ónerkásibi salalarynda jańa óndiris qurý nemese qoldanystaǵy óndiristi keńeıtý boıynsha, negizgi kapıtalǵa salynǵan ınvestıtsııalar kólemi 100 mln teńgeden kem emes, iske asyrý merzimi 5 jyldan aspaıtyn jáne basqa da ólshemderi bar ınvestıtsııalyq jobalar qaralatyn bolady. Bul rette aǵymdaǵy qaryzdardy qaıta qarjylandyrý jobalary qaraýǵa jatpaıdy.
Otyrysqa qatysýshylar aýyl sharýashylyǵy, hımııa, toqyma, mashına jasaý jáne basqa da salalarda ımportty almastyrý boıynsha birqatar naqty jobalardy qarady, olar barlyǵy 4 myńǵa jýyq jańa jumys ornyn qurýǵa jáne 350 mlrd teńgeden astam ınvestıtsııa tartýǵa múmkindik beredi.
Úkimet basshysy ımportty almastyrý jáne eksportty ilgeriletý boıynsha belsendi jumysty jalǵastyrýdy tapsyrdy.
«Memleket bıznesti qoldaý jáne kásipkerlikti damytý sharalaryn keńeıtedi», — dedi A. Mamın.