Memleket basshysynyń jumys kestesine birqatar ózgerister engizildi
ASTANA. QazAqparat - QR Prezıdentiniń baspasóz hatshysy Aıdos Úkibaı Zakon.kz ınternet-portalynyń suraqtary boıynsha Memleket basshysynyń jumys kestesine qatysty túsinikteme berdi. Bul týraly Aqordanyń baspasóz qyzmeti habarlady.
«Zakon.kz ınternet-portaly:
- Qazir Memleket basshysynyń densaýlyǵy qalaı?
Aıdos Úkibaı:
- Ol salqyn tıip, syrqattanýyna baılanysty emdelýde. Jalpy, densaýlyǵyna qatysty eshqandaı alańdaýshylyq joq.
Zakon.kz ınternet-portaly:
- Prezıdenttiń jumys kestesi qaıta qarala ma? Sheteldik aqparat kózderi onyń Ázerbaıjan men Armenııaǵa barýy múmkin ekenin aıtyp jatyr. Elbasy bul saparlarǵa bara ma?
Aıdos Úkibaı:
- Jumys kestesine birqatar ózgerister engizildi. Osy aptanyń sońyna deıin Memleket basshysynyń halyqaralyq sharalarǵa qatysýy josparlanyp otyrǵan joq. Erevandaǵy UQShU otyrysyna Qazaqstan Respýblıkasynyń Premer-Mınıstri qatysady.
Prezıdenttiń jumysy odan ári ádettegi kestege saı jalǵasatyn bolady», delingen jazbada.
