Memleket basshysynyń Joldaýy birqatar merzimi jetken máselelerdi sheshýge múmkindik beredi - Á.Isekeshev
ASTANA. QazAqparat - Memleket basshysy Nursultan Nazarbaev bıylǵy Joldaýynda Qazaqstan halqyna munaı-gaz resýrstaryn paıdalanýǵa negizdelgen burynǵy modelden bas tartyp, qýatty jeke sektorǵa, damyǵan adamı kapıtal men ekonomıkany ártaraptandyrýǵa negizdelgen damýdyń jańa modeliniń baǵdaryn belgilep berdi.
QR Investıtsııalar jáne damý mınıstri Áset Isekeshev osyndaı pikir bildirdi.
«Joldaýda birqatar ekonomıkadaǵy merzimi jetken máselelerdi sheshý týraly tapsyrmalar berildi. Olardyń ishinde memlekettik sektor, básekelestiktiń kenje damýy, bankrottyqtyń qıyn úderisteri, bankterdegi máseleli aktıvter jáne taǵy basqalary bar. Qosymsha amaldar Elbasy "100 qadam" Ult josparynda belgilep bergen ınstıtýtsıonaldyq jáne júıeli reformalarmen birge qysqa merzimde jańa modelge kóshýge múmkindik beredi», - dep túsindirdi mınıstr.
Áset Isekeshev, sondaı-aq, Elbasy Joldaýynda adamı kapıtalǵa asa mán berilgenin atap ótti: «Qazaqstan osy óńirde jumys kúshi resýrsy, sonyń ishinde tehnıkalyq mamandar, jumysshylar men ınjenerler sapasy boıynsha úzdik bolýy tıis. Sondyqtan qazir osy máselege basa nazar aýdaratyn bolamyz», - dedi ol.
