Memleket basshysynyń týysymyz dep alaıaqtyq jasaǵan qylmystyq top quryqtaldy
ASTANA. 1 sáýir. QazAqparat /Marlan Jıembaı/ - Memleket basshysynyń jaqyn týysymyz dep alaıaqtyq jasaǵan qylmystyq top quryqtaldy. Bul týraly búgin BAQ ókilderine QR ІІM resmı ókili Qýanyshbek Jumanov málim etti.
«Іshki ister mınıstrliginiń jedel izdestirý is-sharalarynyń nátıjesinde 5 adamnan quralǵan alaıaqtar toby quryqtaldy. Olar ózderin Memleket basshysynyń jaqyn týystary retinde tanystyryp, ortalyq memlekettik jáne jergilikti atqarýshy organdardyń birinshi basshylaryna tenderler ótkizý kezinde máselelerdi oń sheshý týraly ótinish bildirip, sondaı-aq kommertsııalyq sıpattaǵy ózge de usynystar bildirgen», - dedi Q. Jumanov.
Onyń aıtýynsha, ustalǵandardyń ishinde 2 áıel, 3 er adam bar. Sonymen qatar áıel adamnyń biri buǵan deıin alaıaqtyq isi úshin sotty bolǵandyǵy belgili boldy. Atalǵan fakti boıynsha ІІM tarapynan qylmystyq is qozǵalyp, ýaqytsha oqshaýlaý ornyna qamaldy. Sonymen qatar qajetti jedel tergeý amaldary júrgizilýde.
Alaıaqtar qarjy, ishki ister mınıstrlikterine, sondaı-aq oblystardyń biriniń prokýratýrasyna ótinish bildirgen. Qylmysty uıymdastyrýshylar men oǵan qatysýshylar Qaraǵandy oblysynyń týmalary. Alaıaqtar jergilikti jerlerde iri kommertsııalyq jobalar boıynsha óz paıdasyna oń sheshim jasaý boıynsha ótinish bildirgen. «Olar sondaı-aq ishki ister vedomstvosy basshysyna iri qylmystyq isterdiń barasyna yqpal etýge ótinish jasaǵan. Tergeý múddesine saı basqa aqparattar berilmeıdi», - dedi ol.
