Memleket basshysynyń tapsyrmalaryn oryndaý maqsatynda «Ǵylym týraly» zańnyń jańa redaktsııasy ázirlengen
ASTANA. Naýryzdyń 26-sy. QazAqparat - Úkimet «Ǵylym týraly» zań jobasyn Májilistiń qaraýyna usyndy. Bul zań jobasy Memleket basshysynyń tapsyrmalaryn oryndaý maqsatynda ázirlengen,
dep habarlaıdy QazAqparat.
Qazirgi ýaqytta «Ǵylym týraly» jáne «Innovatsııalyq qyzmetti memlekettik qoldaý týraly» Qazaqstannyń zańdary memlekettik ǵylymı-tehnıkalyq jáne ınnovatsııalyq saıasattyń negizderin retteıtin zańnamalyq aktiler bolyp tabylady. Ǵylymǵa baılanysty quqyqtyq qatynastar elimizdiń Azamattyq, Bıýdjet, Eńbek jáne Salyq kodeksterinde, Qazaqstannyń «Memlekettik satyp alý týraly» jáne «Bilim týraly» zańdarynda kórsetilgen, olardyń normalarynda ǵylymı-tehnıkalyq salanyń ereksheligi eskeriledi.
«Ǵylym týraly» zańnyń jańa redaktsııasyn ázirleý ІІarlamenttiń tórtinshi shaqyrylymynyń 2009 jylǵy qyrkúıektiń 1-indegi III sessııasynyń ashylýynda jáne 2009 jylǵy qyrkúıektiń 4-indegi ǵylym máseleleri boıynsha ótken keńeste Memleket basshysy bergen tapsyrmalardy oryndaý qajettiligine negizdeledi. Olar ǵylymdy basqarý jáne ǵylymı jáne ǵylymı-tehnıkalyq qyzmetti uıymdastyrý prıntsıpterin jetildirý qajettiligimen túsindiriledi.
Jańa «Ǵylym týraly» zań jobasynyń normalary ǵylym salasyn odan ári damytýǵa baǵyttalǵan aktini bildiredi ári onyń ǵylymı jáne ǵylymı-tehnıkalyq qyzmettiń barlyq sýbektileriniń teń quqylylyǵy prıntsıpteri saqtalatyn negizdemelik sıpaty bar.
Osy zań jobasynda el damýynyń ekonomıkalyq basymdyqtaryna sáıkes ǵylym jónindegi ulttyq basymdyqtardy aıqyndaıtyn jáne ǵylymı jáne ǵylymı-tehnıkalyq qyzmetti memlekettik bıýdjetten qarjylandyrý jóninde usynystar qalyptastyratyn strategııalyq organ retinde Úkimettiń janyndaǵy Joǵary ǵylymı-tehnıkalyq komıssııanyń rólin zańnamalyq turǵyda kúsheıtý kózdelgen.
Sondaı-aq ulttyq ǵylymı ınnovatsııalyq júıeni damytýdy ekonomıkalyq yntalandyrý, ǵylymı, ǵylymı-tehnıkalyq jáne ınnovatsııalyq qyzmet salasyndaǵy memlekettik-jeke menshik áriptestikti damytý sharalaryn qabyldaý qarastyrylýda.
Grantpen jáne baǵdarlamalyq nysanaly qarjylandyrý sheńberinde ǵalymdarǵa qosymsha jalaqy alý múmkindigin berý arqyly jalaqyny kóterý jolymen ǵylymı qyzmettiń bedelin jáne tartymdydyǵyn kóterýge baǵyttalǵan normalardy zańnamalyq bekitý qajet.
Ǵylymdy basqarý jáne qarjylandyrý prıntsıpteriniń ózgerýine baılanysty ǵylym salasyndaǵy ýákiletti organnyń jáne tıisti salalardaǵy ýákiletti organdardyń quzyretine túzetý júrgizý kerek.
Zań jobasyn iske asyrý transfert, eldi damytýdyń basym baǵyttary boıynsha jańa bilimdi qurý jáne taratý arqyly Qazaqstan ekonomıkasynyń básekege qabilettiligin kóterýge yqpal etetin ulttyq ınnovatsııalyq júıeni qurýǵa yqpal etedi.
