Memleket basshysynyń Polşa eline sapary nátıjeli ótti
ASTANA. QazAqparat - Kári qurylyq - Eýropa tórindegi qanattas, nıettes el - Polshamen aradaǵy ekonomıkalyq jaǵynan tıimdi, adamı-gýmanıtarlyq turǵydan jan-jaqty qarym-qatynastarymyz jyldan-jylǵa órkendep, damyp keledi.
Alys-beris sondaı-aq memleketterimiz arasyndaǵy saıası baılanystar arqyly da nyǵaıa túsýde.
Buǵan Elbasymyz Nursultan Nazarbaevtyń Polshanyń bas qalasy - Varshavaǵa jýyrda tabyspen aıaqtalǵan resmı sapary, Prezıdent Andjeı Dýdamen kelissózderi kýá.
Aqordanyń habar kózderi keltirgen derekterge sáıkes sapar barysynda saýda-ekonomıka, ınvestıtsııa, aýyl sharýashylyǵy, tranzıt-kólik jáne mádenı-gýmanıtarlyq salalardaǵy ózara is-qımyldy nyǵaıtý máseleleri talqylanǵan.
Memleketter basshylary ózara múddelilik jaǵdaıynda birqatar baǵyttar boıynsha keleshegi mol jobalardy iske asyrý máselelerin qarastyrǵan. Budan bólek, taraptar halyqaralyq kún tártibindegi ózekti máseleler jóninde pikir almasqan.
Kezdesý barysynda Elbasy Nursultan Nazarbaev Polsha kóshbasshysyna ekijaqty qarym-qatynastyń damýynda ilgerileýshilik, sondaı-aq onyń aıasyn keńeıte túsý úshin zor áleýet bar ekenin atap ótse, Prezıdent Andjeı Dýda Polsha aldaǵy «EKSPO-2017» halyqaralyq kórmesine belsene qatysatynyn jáne bul is-sharaǵa jeke óziniń kelýge ázir ekenin jetkizgen.
El men eldi jaqyndastyratyn ekonomıkalyq qarym-qatynastarǵa kelsek, Polsha Qazaqstannyń jetekshi saýda áriptesteriniń biri bolyp tabylady, Eýropalyq Odaq elderi arasynda 11-shi orynda jáne álem elderi arasynda 23-shi orynda tur. Sońǵy jyldary ózara saýda aınalymy turaqty túrde ósýge umtylys baıqatyp otyr.
2015 jyly birqatar ulǵaıýdan keıin ókinishke qaraı saýda aınalymynyń kemýi tirkelgen, munyń ózi eń áýeli álemdik naryqtardaǵy shıkizat taýarlary baǵasy quldyraýynyń saldary bolyp tabylady.
Qazaq jaǵy bergen statıstıkalyq derekterge sáıkes 2015 jyly polıak-qazaq saýdasynyń deńgeıi 1 130 011,0 myń AQSh dollaryna jetip, 2014 jylmen salystyrǵanda 104 318,6 myń AQSh dollaryna artyq boldy (ósim 10,2%).
2015 jyly Qazaqstan Respýblıkasynyń Polshaǵa eksportynyń kólemi 789 198,9 myń AQSh dollaryn qurady, bul 2014 jylmen salystyrǵanda 193 514,0 myń AQSh dollaryna artyq boldy (32,5%-ǵa ulǵaıdy), osy kezeńde Polshadan Qazaqstanǵa ımporttaý kólemi 89 195,3 myń AQSh dollaryna tómendep, 340 812,1 myń dollar qurady (20,7%-ǵa kemidi).
Іs júzinde synnan ótken qyzmet túrleri men yntymaqtastyq óristeri qazir de jalǵasyn tabýda. Polsha Qazaqstanmen aradaǵy yntymaqtastyqty odan ári damytýdyń ken óndirý ónerkásibi, mashına jasaý, logıstıka, kólik, aýyl sharýashylyǵy, energetıka, qorǵanys jáne farmatsevtıka ónerkásibi sektorlary sııaqty salalarda keleshegi baryn kórip otyr.
Qazaqstan ekonomıkasynyń serpindi damýy, sondaı-aq Prezıdenti Nursultan Nazarbaevtyń «Bolashaqqa jol» joldaýynda alǵa tartylǵan, el úkimeti usynyp otyrǵan ınvestıtsııalyq yntalandyrý saıasaty múddeli polıak fırmalary aldynan aq jol ashýda.
Eki el kásipkerleri úshin altyn kópir sanalatyn, tıimdi baılanystardy nyǵaıtýmen qatar polıak, qazaq orys tilderinde «Polıak-Qazaqstan ekonomıkalyq bıýlletenin» shyǵaryp kele jatqan Polıak-Qazaq saýda-ónerkásip palatasy men «Qazaq gazetteri» jaýapkershiligi shekteýli seriktestigi arasyndaǵy aqparattyq yntymaqtastyq serpindi damyp keledi.
Halyqtyq dıplomatııa sıpatyndaǵy mundaı júzdesýler baýyrlastyqty bekemdeýge sebepker bolatyny sózsiz.
