Memleket basshysynyń qoldaýy arqasynda Qazaqstanda bıznes úshin óte jaıly ahýal qalyptasyp otyr - M.Pishembaev
ASTANA. QazAqparat - Memleket basshysynyń qoldaýy arqasynda Qazaqstanda bıznes úshin óte jaıly ahýal qalyptasyp otyr. Mundaı pikirdi QR Parlamenti Májilisiniń depýtaty Meıram Pishembaev Qazaqstan Prezıdenti N.Nazarbaevtyń Shetel ınvestorlary keńesiniń 27-shi jalpy otyrysynda sóılegen sózine oraı bildirdi.
«Shetel ınvestorlary keńesiniń 27-shi jalpy otyrysynda Prezıdentimiz Nursultan Ábishuly Nazarbaev jarııa etken ınvestorlardy memlekettik qoldaýdyń qosymsha sharalary sheteldik jáne otandyq ınvestorlardy óz qarajattaryn óńdeý ónerkásibi salasyna barynsha mol quıýǵa yntalandyrdy. Osylaısha, Qazaqstannyń Údemeli ındýstrıaldy-ınnovatsııalyq damý memlekettik baǵdarlamasynyń ekinshi besjyldyǵy ónerkásip óndirisin damytýǵa qarqyndy serpin beredi», - dedi M.Pishembaev.
Sonymen qatar depýtat Qazaqstanda kez kelgen elde kezdese bermeıtin saýatty ınvestıtsııalyq ahýal qalyptasyp otyrǵandyǵyn basa aıtty.
Prezıdent atap ótken ınvestorlardy memlekettik qoldaýdyń qosymsha sharalary mynalar: ındýstrııalandyrýdyń basymdyqty salalarynyń ınvestorlary korporatıvtik tabys salyǵynan, jer salyǵynan 10 jyl merzimge bosatylatyn bolady. Al múlik salyǵynan 8 jylǵa bosatylady. Memleket nysandy paıdalanýǵa bergennen keıin sheteldik ınvestorlarǵa kúrdeli shyǵystarynyń 30 paıyzyna deıin ótep beretin bolady. Investıtsııalyq jobany júzege asyrýdyń búkil kezeńinde jáne nysandy iske qosqannan keıin bir jyl eshqandaı kvotasyz jáne ruqsatsyz jumys kúshin tartýǵa múmkindik beriledi. Investorlarǵa qosymsha qun salyǵy men aktsızden basqa, barlyq salyqtar men tólemderdiń mólsherlemelerine qatysty zańnamanyń turaqtylyǵyna kepildik usynylady.
Sonymen qatar ol ınvestorlar úshin memlekettik mekemelermen jumys kezinde «bir tereze» qaǵıdaty engiziletinin jetkizdi. Investorlardyń quqyqtary men múddelerin qorǵaýdy qamtamasyz etý úshin «ınvestıtsııalyq ombýdsmen» ınstıtýty zańnamalyq deńgeıde engiziletin bolady. Sondaı-aq basymdyǵy bar salalarda jumys isteıtin kásiporyndarǵa kepildendirilgen tapsyrystar alýǵa járdem jasalady.
