Memleket basshysynyń bıylǵa Joldaýynda kóterilip otyrǵan asa mańyzdy máselelerdiń biri - bilim berý júıesin jetildirý, jastardyń biliktiligin arttyrý - Joldaýǵa únqatý
Bul pikirdi QR Prezıdenti janyndaǵy Memlekettik basqarý akademııasynda ótken keńeıtilgen otyrysta atalǵan akademııanyń úshtildilik baǵdarlamasynyń úılestirýshisi Elmıra Orazalıeva bildirdi.
«Soǵan oraı, búgingi azamattyq qoǵamdy ýaqyt talabyna saı damytý mindetti túrde adamdyq kapıtal, adamı resýrstarǵa qatysty. Al sonyń ishinde memlekettik qyzmetshilerdiń biliktiligin qalaı arttyramyz, olardyń kásibı daıyndyǵyna qalaı nazar aýdaramyz degen máseleler týyndap otyr», deıdi ol.
E.Orazalıevanyń aıtýynsha, bul máselerdi sheshý Memleket basshysynyń Joldaýynda atap ótilgendeı, jańa ınnovatsııalardy meńgerý, meńgertý arqyly júzege aspaq. Joldaýda aıtylǵan taǵy bir asa mańyzdy másele - otandyq ǵylymı júıelermen qatar halyqaralyq deńgeıde tájirıbe almasý ekendigin atap ótken ol «sondyqtan, syrttan shetel sarapshylaryn shaqyrý máselesi aıqyndalyp otyr», deıdi.
«Barlyq memlekettik qyzmetshilerdiń aldyna qoıylatyn birinshi talap, bul bizdiń Ar-namys kodeksimizde atap ótilgendeı, Otan múddesin qorǵaý qabiletin jáne otansúıgishtik qasıetin damytýmen qata, alǵa qoıylǵan basty maqsattardyń biri bizdiń memleketimizdiń básekege qabiletti 50 eldiń qataryna kirýine atsalysý», dedi óz sózine ol.
