Memleket basshysynyń bastamasymen qurylǵan bilim salasyndaǵy ınnovatsııalyq jobalardy fınlıandııalyq áriptester joǵary baǵalaýda - Prezıdent poshtasynan
Bul týraly Aqordanyń baspasóz qyzmeti habarlady.
Óz hatynda avtorlar «Bolashaq» halyqaralyq baǵdarlamasy aıasynda Fınlıandııada ǵylymı-pedagogıkalyq taǵylymdamadan ótýge jasalǵan múmkindik úshin Memleket basshysyna aıryqsha jyly lebizben alǵystaryn jetkizgen.
Muǵalimder men taǵylymdamadan ótýshiler álemniń úzdik pedagogıkalyq ınnovatsııalyq tájirıbelerin tanyp-bilý ony elimizdiń orta bilim salasyna engizýge jáne beıimdeýge múmkindik beretinin atap ótken.
«Bizdiń oqýymyz Fınlıandııa Prezıdentiniń Astanaǵa 2013 jylǵy sáýir aıyndaǵy resmı sapary barysynda Siz qol jetkizgen ýaǵdalastyqtyń arqasynda múmkin boldy. Bizdiń ǵylymı-pedagogıkalyq taǵylymdamamyz «Bolashaq» halyqaralyq baǵdarlamasynyń 20 jyldyq mereıtoıyna oraılas kelgeni biz úshin eki ese mártebe. Mine, 22 jyl elimiz Sizdiń basshylyǵyńyzben alǵa nyq qadam basyp keledi. Qazaqstannan jyraqta júrip te biz óz Otanymyz úshin maqtanyshty sezinemiz», - delingen hatta.
Hat ıeleri Qazaqstannyń jetistikterin, ásirese Memleket basshysynyń bastamasymen qurylǵan bilim salasyndaǵy ınnovatsııalyq jobalardy fınlıandııalyq áriptesteriniń joǵary baǵalaıtynyn jetkizgen.
Hat sońynda muǵalimder men taǵylymdamadan ótýshiler Nursultan Nazarbaevqa zor densaýlyq, al elimizge baq-bereke tilegen.
