Memleket basshysynyń arnaıy ýákili I. Adyrbekov Rıgada birqatar kezdesýler ótkizdi

ASTANA. QazAqparat - 2015 jyldyń 4-5 naýryzynda Qazaqstan Respýblıkasy Prezıdentiniń Arnaıy ýákili, Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Ikram Adyrbekov Latvııa Respýblıkasynda saparda boldy.

Sapardyń maqsaty 2017-2018 jyldarda Birikken Ulttar Uıymy Qaýipsizdik Keńesiniń turaqty emes músheligine Qazaqstannyń kandıdatýrasyn ilgeriletý, sondaı-aq eki el arasyndaǵy parlamentaralyq ózara yntymaqtastyqtyń qazirgi jaǵdaıy men bolashaǵyn talqylaý bolatyn.

Rıgada Latvııanyń Syrtqy ister mınıstri Edgars Rınkevıchspen, Seım hatshysy, Prezıdıým múshesi Andreı Klementevpen, Seımniń Halyqaralyq ister jónindegi komıtetiniń hatshysy Sergeı Potapkınmen, Qazaqstan Parlamentimen yntymaqtastyq jónindegi depýtattar tobynyń basshysy, «Latvııaǵa shyn júrekten» partııasynyń kóshbasshysy Ingýna Sýdrabamen kezdesýler ótti.

Syrtqy ister mınıstrimen bolǵan suhbat barysynda I.Adyrbekov 2016 jyly BUU Qaýipsizdik Keńesiniń turaqty emes músheligine saılaýynda Qazaqstannyń usynymyn qoldaý jónindegi Prezıdent N.Nazarbaevtyń Latvııa Respýblıkasynyń Prezıdenti Andrıs Berzınshke joldaýyn tabys etti. Qazaqstan depýtat aımaqtyq jáne halyqaralyq turaqtylyq pen qaýipsizdikti nyǵaıtý, onyń ishinde ıadrolyq qarýdy taratpaý jáne qarýsyzdandyrý salasyna qosqan bizdiń elimizdiń úlesi týraly habardar etti. Eýropalyq Odaqtyń Keńesindegi Latvııa tóraǵalyǵynyń tabysty bastalýymen quttyqtady jáne Rıganyń Astana men Eýroodaq arasyndaǵy áriptestiktiń keńeıýi men tereńdeýine óz úlesin qosatyndyǵyna senim bildirdi.

Latvııanyń Seıminde ótken kezdesýler barysynda ekijaqty qatynastardyń aýqymdy máseleleri talqylanyp, parlamentaralyq yntymaqtastyqtyń mańyzdy basymdyqtary týraly pikir almasyldy. Latvııalyq depýtattar Elbasynyń «Nurly jol» joldaýynyń negizgi baǵyttarymen, sondaı-aq Qazaqstannyń syrtqy jáne ishki saıasatyndaǵy negizgi oqıǵalarymen tanystyryldy.

Qazaqstan senatory latysh tilinde tuńǵysh ret shyqqan Qazaqstan Respýblıkasy Prezıdenti Nursultan Nazarbaevtyń «G-global: XXI ǵasyr álemi» atty kitabynyń tusaýkeseri - dóńgelek ústel jumysyna da qatysty. Qazaqstannyń G-Global ıdeıasyna bildirgen yqylasy úshin Latvııa tarapyna alǵys aıtyp, usynylyp otyrǵan dıalogqa belsendi qatysýǵa shaqyrdy. Qazaqstanda bolyp jatqan saıası jáne ekonomıkalyq jetistikter men halyqaralyq basqa bastamalar jóninde baıandady.

Kezdesýlerge Qazaqstannyń Latvııadaǵy Elshisi Baýyrjan Muhametjanov ta qatysty.