Memleket basshysyna joldanǵan saýaldardyń sany 6 myńnan asty
ASTANA. Qarashanyń 4-i. QazAqparat /Arman Asqarov/ - QR Prezıdenti Nursultan Nazarbaevtyń tikeleı jeli arqyly halyqpen tildesýine oraı jumys istep jatqan Baılanys ortalyǵyna osy ýaqytqa deıin 6 myńnan astam saýal kelip tústi,
dep habarlaıdy QazAqparat.
Mańyzdy máselelerdiń birinshi qatarynda turǵan halyqty áleýmettik qorǵaý salasy boıynsha zeınetaqy júıesin qaıta qaraý, kópbalaly otbasylar men múgedek jandarǵa kómek berý taqyrybyndaǵy saýaldar jıi túsýde. Ekinshi kezektegi turǵyn úı máselesi boıynsha jas otbasylarǵa baspana jaǵynyn járdemdesý, memlekettik baǵdarlama aıasynda úı alý, Astana jáne Almaty qalalaryndaǵy «Lesnaıa polıana», «Jeti jol», «Bereke», «Han Táńiri», «Úsh tóbe», «Mereke-2», «Jaıly-1», «Bes tulǵa» jáne «Taý samaly» sııaqty turǵyn-úı keshenderiniń qurylysyna aqsha salǵan úleskerler problemasy kóptep kóterilýde. Sondaı-aq qazaqstandyqtardy zańdy saqtaý jáne otandyq bilim berý salasyndaǵy tártip buzý oqıǵalary jıi mazalaýda.
Esterińizge sala keteıik, 2009 jyly qarashanyń 13-i kúni Qazaqstan Respýblıkasynyń Prezıdenti N.Nazarbaev «Qazaqstan», «Habar», «Astana qalalyq teledıdary» telearnalary jáne «Qazaq radıosy», «Astana radıosy» boıynsha ótetin tikeleı efırde azamattardyń teleefır, telefon ınternet jáne SMS habarlamalary arqyly túsken suraqtaryna jaýap beretin bolady. Suraqtardy respýblıka boıynsha +7 (7172) 555-777 telefony men KCell, Beeline, Neo, Altel uıaly baılanysyn paıdalanýshylar úshin SMS habarlamalary arqyly 1111 nómirine jiberýge bolady. Sondaı-aq
www.line.gov.kz saıtynyń tıisti tarmaǵyn paıdalana otyryp, beınesuraqty joldaýǵa bolady. Al jazbasha saýaldy vopros@akorda.kz elektrondyq mekenjaıyna jiberýge múmkindik bar.
Aıta keteıik, «Qazaqtelekom» usynǵan baılanys tegin bolsa, uıaly telefondarǵa arnaıy tólemder qarastyrylǵan. «Tikeleı jeli» kezinde Elbasynyń nazaryna ilikpeı qalǵan saýaldarǵa tıisti memlekettik organdar bir aıdyń kóleminde jaýap ázirlep, saıtqa ornalastyratyn bolady. Al Interneti joq aýyldy jerler úshin ákimdikter janynan qoǵamdyq qabyldaý bólimderi ashylǵan.
