Memleket basshysyna tutynýshylardyń quqyqtaryn qorǵaýdyń jaı-kúıi týraly jyldyq esep usynylady - Májilis

ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldany.

Zań jobasy negizinen tutynýshylarynyń quqyqtaryn qorǵaý salasyndaǵy zańnamany odan ári jetildirip, bul baǵyttaǵy olqylyqtar men kollızııalardy joıýǵa baǵyttalady. Qujat boıynsha tutynýshylardyń quqyqtaryn qorǵaý salasyndaǵy ýákiletti organǵa qosymsha quzyretterdi, onyń ishinde tutynýshylarǵa ótkiziletin ónimder men kórsetiletin qyzmetter boıynsha talaptardyń, reglamentterdiń, normatıvtik qujattardyń saqtalýyn baqylaýdy júzege asyrý jónindegi fýnktsııany berý qarastyrylady. «Zań jobasy qabyldanǵan mindettemeler sheńberinde tutynýshylardyń múddelerin qorǵaý úshin tıimdi jáne teń jaǵdaılar qalyptastyrýǵa baǵyttalady. Jalpy usynylyp otyrǵan túzetýler ýákiletti organnyń quzyretin nyǵaıtýdy, áleýmettik jaýapty kásipkerlik ortany qalyptastyrýǵa yqpal etetin tutynýshylardyń qosymsha quqyqtyq kepildikterin qamtamasyz etýdi qarastyrady», - deıdi Ulttyq ekonomıka mınıstri Erbolat Dosaev. Onyń aıtýynsha, zań jobasymen tutynýshylardyń quqyqtaryn qorǵaýdyń jańa pármendi tetikterin qurý, sonymen birge tutynýshylardyń qoǵamdyq birlestikteriniń rólin kúsheıtý qarastyrylady. «Atap aıtqanda, taýarlardy satýǵa, qaıtarýǵa, aýystyrýǵa qoıylatyn talaptar jetildiriledi. Bul rette tutynýshynyń taýardyń kemshiligine qatysty talaptaryn qoıý, sapasy talapqa saı emes taýardy aýystyrý merzimi belgilenip otyr. Budan bólek, tutynýshylardyń shaǵymdaryna jartyjyldyq, jyldyq taldaý júrgizý jáne tutynýshylardyń quqyqtaryn qorǵaý máseleleri boıynsha memlekettik organnyń qyzmetine memlekettik taldaý júrgiziledi. Sonymen qatar jyl saıyn Memleket basshysyna elimizdegi tutynýshylardyń quqyqtaryn qorǵaý jaı-kúıi týraly jyldyq esep usynylatyn bolady», - dedi mınıstr. Onyń sózine qaraǵanda, zań jobasymen tutynýshylardy aqparattandyrý, keńester berý jáne saýattandyrý máseleleri jetildirilip, tıimdiligi arttyrý kózdeledi. Tutastaı alǵanda, zań jobasyn qabyldaý tutynýshylardyń quqyqtaryn qorǵaý júıesin ınstıtýtsıonaldyq kúsheıtýge, tutynýshylar men kásipkerler múddeleriniń teńestirilýine, azamattardyń tutynýshylyq quqyqtaryn qoǵmdyq birlestikter arqyly tıimdi qorǵaýǵa, tutynýshylardyń quqyqtyq saýattylyq deńgeıiniń artýyna alyp keledi.