Memleket basshysy Joldaýda saıası reformalardyń jańa paketin tanystyrady

NUR-SULTAN. QazAqparat - Memleket óziniń bazalyq fýnktsııalarynyń tolyqqandy jáne sapaly oryndalýyn qamtamasyz etýi tıis. Búgin Parlament Májilisiniń jalpy otyrysynda Memleket basshysy Qasym-Jomart Toqaev osylaı málim etti, dep habarlaıdy QazAqparat tilshisi.

«Qyrkúıek aıyndaǵy dástúrli Joldaýymda saıası reformalardyń jańa paketin tanystyramyn. Ol azamattyq qoǵam jáne sarapshylarmen keńeıtilgen ári konstrýktıvti dıalog negizinde daıyndalady. Memleket óziniń bazalyq fýnktsııalarynyń tolyqqandy jáne sapaly oryndalýyn qamtamasyz etýi tıis», - dedi Memleket basshysy.

Sonymen qatar Prezıdent memleket zańdylyq pen quqyqtyq tártiptiń oryndalýyna, jekemenshikke quqyqty jáne azamattar quqyqtary qaýipsizdiginiń qorǵalýyna kepildik berip, áleýmettik ıgilik pen memlekettik qyzmettiń sapasyn qamtamasyz etýi kerek ekenin atap ótti.

Óz kezeginde bıznes pen azamattar zańnamanyń jáne qoǵamdyq tártip normalarynyń saqtalýyna, salyqtardyń ádil tólenýi men eńbek qatynastarynyń ashyqtyǵyna jaýapkershilikpen qaraýy tıis. Osyǵan baılanysty júıeli túrlený baǵdarlamasyn qalyptastyrý mańyzdy.

«Úkimetke jaýapty sarapshylyq qoǵamdastyqpen áne azamattyq qoǵammen birlese tıisti usynystardyń paketin ázirleýdi tapsyramyn. Ol Ulttyq qoǵamdyq senim keńesi otyrystarynyń birinde qaralady», - dedi Memleket basshysy.