Memleket basshysy: Jastar saıasatynda naýqanshyldyqqa jol bermeý kerek

NUR-SULTAN. QazAqparat - Memleket basshysy Qasym-Jomart Toqaev «Egemen Qazaqstan» jáne «Aiqyn» gazetterine bergen suhbatynda jastar saıasatyn tıimdi uıymdastyrýdyń qajettigin atap ótti.

«Jastar saıasatynda, jastar tárbıesinde naýqanshyldyqqa, tıimdiligi tómen sharalardy uıymdastyrýǵa jol bermeý kerek. Sondyqtan, kez kelgen sharany ǵylymı negizge súıenip, júıeli túrde júzege asyrǵanymyz jón. Jastardyń alǵa qoıǵan maqsat-múddelerin bilý úshin naýqanshyldyq emes, naqty zertteýler qajet» dedi Prezıdent.

Sondaı-aq jastar saıasatyn júıeli ári keshendi túrde júrgizýdiń mańyzyna toqtaldy.

«Júıeli ári keshendi áleýmettik zertteý júrgizý arqyly jastardyń muń-muqtajyn, maqsat-múddelerin anyqtap, jastar saıasatyn sol qajettilikterge jaýap beretin deńgeıde uıymdastyrý mańyzdy. Biz jastarǵa bilim berýdi aldyńǵy qatarǵa qoıamyz. Tek bilim ǵana emes, otansúıgishtik rýhta tárbıeleý isin de basty nazarda ustaý kerek» dedi Q.Toqaev.