Memleket basshysy jastar arasynda ajyrasýdyń kóptigine alańdaýshylyq tanytty

NUR-SULTAN. QazAqparat - Jas shańyraq baqyt besigine aınalýy tıis. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Jastar saıasaty týraly aıtqanda otbasy ınstıtýtyn umytpaýymyz kerek. Bul – dástúrdi, ulttyq qundylyqtardy jáne urpaqtar sabaqtastyǵyn saqtaý úshin óte mańyzdy. Ókinishke oraı, qazirgi tańda ajyrasý faktileri osy saladaǵy túıtkildi máseleniń birine aınaldy», - dedi Qasym-Jormat Toqaev.

Memleket basshysy bul máselege áli kúnge deıin basa mán berilmeı otyrǵandyǵyn basa aıtty.

«Halqymyzda »Otan – otbasynan bastalady« degen qanatty sóz bar. Árbir otbasyn saqtaý – Otanymyzdyń berik bolýynyń kepili. Jas shańyraq baqyt besigine aınalýy tıis. Olardyń árqaısysyna tutastyq pen tatýlyqtyń dástúrin ornyqtyrýymyz kerek. Zııaly qaýym ókilderi men ustazdar jastar arasynda túsindirý jumystaryn júrgizip, otbasy qundylyqtaryn dáripteýi qajet. Munyń memleket úshin mańyzy óte zor. Jastardy tárbıeleý isinde ata-analarǵa da zor jaýapkershilik júkteledi», - dedi QR Prezıdenti.

Memleket basshysy jasóspirimderge erekshe kóńil bólýimiz kerektigin atap ótti.

«Elimizde 14 jasqa deıingi balalardyń sany sońǵy 5 jyl ishinde shamamen 1 mıllıonǵa kóbeıdi. Qazir olardyń sany 5 mıllıonnan asty. Jasóspirimder arasyndaǵy óz-ózine qol jumsaý jáne zorlyq-zombylyqtan qorǵaý máselesi kúntártibinen túspeı tur. Bizge bul baǵytta naqty sharalar qabyldaý qajet», - dedi Q.Toqaev.