Memleket basshysy: Jańa jyl barshamyzdy qashanda jańa jetistikke, jańa bıikke jeteleıdi
ASTANA. QazAqparat - Memleket basshysy Nursultan Nazarbaev barsha qazaqstandyqtardy Jańa 2016 jylmen quttyqtady.
Qurmetti otandastar!
Sanaýly sátterden soń biz jańa - 2016 jylǵa qadam basamyz!
Jańa jyl - bárimiz aq peıilmen asyǵa kútetin aıryqsha mereke. «Ótken jylǵa ókpe joq, jańa jyldan úmit kóp» deıdi halqymyz. Tarıh qoınaýyna attanǵaly turǵan jyl elimiz úshin jemisti boldy. Qazaqstan daǵdarysqa qaramastan, óziniń qutty qadamyn jalǵastyrdy.
Bıyl biz tarıhy tereńde jatqan tamyrly halyq ekenimizdi barshaǵa áıgiledik. Uly Dalada ult ataýymen memleket qurǵan babalar rýhyna taǵzym ettik. Jańa Qazaqstannyń qalyptasýyna negiz qalaǵan Ata Zańymyzdy ulyqtadyq. Baq-berekemizdiń uıytqysy - Qazaqstan halqy Assambleıasynyń bedelin bıiktettik. Ardagerlerimizdi ardaqtap, Uly Jeńistiń mán-mańyzyn urpaqtyń sanasyna sińirdik. Qazaqtyń úshinshi ǵaryshkeri kók júzine samǵap, mereıimizdi ósirdi. Saýdamyz sapaly, taýarymyz tartymdy bolýy úshin Dúnıejúzilik Saýda Uıymyna múshe boldyq. Bıylǵy Prezıdent saılaýynda birligi bar el ekenimizdi taǵy da dáleldedik.
Ardaqty aǵaıyn!
Jańa jyl barshamyzdy qashanda jańa jetistikke, jańa bıikke jeteleıdi. Elimiz keler jyly Táýelsizdiktiń 25 jyldyq belesine shyǵady. Shırek ǵasyrlyq shejiremiz bizdi mereıli memleket retinde álemge tanytty. Baǵytymyzdy belgilegen Ult jospary ulaǵatty jolǵa bastap keledi. Aldaǵy Meshin jylynda da abyroıymyz asqaq bolady dep senemin!
Jańa jyl árbir shańyraqqa baqyt, shattyq, tabys ákelsin! Elimizdiń yrys-nesibesi molynan bolyp, tatýlyǵy arta bersin!
Jańa jyl qutty bolsyn!
