Memleket basshysy usynǵan sharalardy iske asyryp, qysqa merzimde eldi qalpyna keltirýge tıispiz – Senat depýtaty

NUR-SULTAN. QazAqparat – QR Parlamenti Senatynyń depýtaty Ǵumar Dúısembaev halyqty eldegi jaǵdaıǵa qatysty Memleket basshysy qabyldap jatqan shuǵyl sheshimderdi qoldaýǵa shaqyrdy, dep habarlaıdy QazAqparat tilshisi.

«Elimizde qalyptasqan jaǵdaı, Prezıdenttiń málimdemesi jáne onyń halyqqa úndeýi, sondaı-aq qabyldaǵan shuǵyl sheshimderdiń astynda ózindik negiz bar. Óıtkeni, eldi dúrliktirgen teris nıettiler óz áreketteri úshin mindetti túrde jaýap berýi tıis. Memleket basshysy usynǵan sharalardy iske asyryp, qysqa merzimde eldi qalypqa keltirýge tıispiz. Halyq Prezıdenttiń tártip ornatý týraly úndeýin qoldaıdy jáne túsinistikpen qaraıdy dep senemin», - dedi Ǵumar Dúısembaev.

Onyń aıtýynsha, eldegi jaǵdaıdy jaqsartý úshin ár azamat óz úlesin qosý kerek.

«Elimizdiń biraz óńirlerinde ásirese Almaty, Qyzylorda, Shymkent qalalarynda jaǵdaı múshkil boldy. Qalany qıratyp, tonady, beıbit jáne áskerıler men quqyq qorǵaý organdarynyń ókilderi mert boldy. Olardyń ishinde 18-19 jastaǵy sarbazdar da bar. Sondyqtan da men Memleket basshysy qabyldaǵan sheshimderdi qoldaýǵa shaqyramyn. Shuǵyl sheshimder el tynyshtyǵy men keleshegi úshin qabyldanyp otyr. Ondaǵy maqsat – elimizdiń ár azamatyn qorǵaý», - deıdi ol.