Memleket basshysy ulttyq neırohırýrgııa ortalyǵyn 15 jyldyǵymen quttyqtady
Memleket basshysy atynan quttyqtaýdy QR Premer-Mınıstrdiń orynbasary, Eńbek jáne halyqty áleýmettik qorǵaý mınıstri Tamara Dúısenova oqyp berdi.
«Sizderdi ulttyq neırohırýrgııa ortalyǵynyń qurylǵanyna 15 jyl tolýymen shyn júrekten quttyqtaımyn. Osy kezeńde klınıka Qazaqstanǵa ǵana emes, búkil Ortalyq Azııa óńirinde neırohırýrgııa salasynyń kóshbasshysyna aınaldy. Sizderdiń qajyrly jumystaryńyzdyń arqasynda bizdiń otandastarymyz eń úzdik álemdik praktıka men men biregeı joǵary tehnologııalyq emdeý ádisterine qol jetkizip otyr. Álemdik medıtsına qoǵamdastyǵy keńinen moıyndaǵan sizderdiń ǵylymı jáne kásibı jetistikterińiz otandyq medıtsınanyń sapaly ósýiniń jarqyn úlgisi. Qazirgi tańda ulttyq neırohırýrgııa ortalyǵy biliktigi joǵary medıtsına mamandarynyń sheberhanasyna, olardyń kásibı bilim men tájirıbe almasýyna qajetti alańǵa aınaldy. Klınıkanyń dárigerleri men barlyq qyzmetkeri adal eńbek etip, ultymyzdyń saýlyǵyn nyǵaıtýǵa zor úlesin qosyp keledi. Memleket densaýlyq saqtaý salasyn keshendi túrde damytyp, medıtsına qyzmetkerleriniń mártebesin kóterý jáne olardy jan-jaqty qoldaý boıynsha júıeli sharalardy qabyldap keledi. Keremet hırýrg jáne Qazaqstannyń naǵyz patrıoty Serik Qýandyquly Aqsholaqov bastaǵan neırohırýrgııa ǵylymı ortalyǵynyń ujymyna amandyq, patsıentterdiń árdaıym saý-salamat bolýyn jáne ǵylymı men medıtsına salasynda jańa jetistikterge jete berýdi tileımin», - delingen quttyqtaý hatynda.
Aıta keteıik, elordada otandyq neırohırýrgtardyń V kongresi ótip jatyr.
