Memleket basshysy Ulttyq ǵylymı medıtsınalyq ortalyqtyń 10 jyldyǵyna arnalǵan halyqaralyq kongreske qatysýshylardy quttyqtady
ASTANA. 7 qazan. QazAqparat /Aıdar Ospanalıev/ - Memleket basshysy Nursultan Nazarbaev Ulttyq ǵylymı medıtsınalyq ortalyqtyń 10 jyldyǵyna arnalǵan «Innovatsııalyq tehnologııalar men medıtsınadaǵy progress, Eýro-Azııalyq Respıratorlyq qoǵamnyń 7-shi kongressi» atty halyqaralyq kongreske qatysýshylardy mereıtoımen quttyqtady.
Prezıdenttiń quttyqtaýyn búgin atalmysh sharanyń ashylý rásiminde Prezıdent Ákimshiliginiń Іshki saıasat bóliminiń meńgerýshisi Darhan Myńbaı jetkizdi. «Osy jyldar ishinde ulttyq ortalyq turǵyndarǵa joǵary, bilikti medıtsınalyq kómek kórsetetin jetekshi, kópsalaly medıtsınalyq mekeme bola bildi. Óziniń kúndelikti qyzmetinde ortalyq medıtsına ǵylymynyń yqpaldasýy men densaýlyq saqtaýdyń is júzindegi tájirıbesiniń úlgisin kórsetip, túrli dertterdi emdeý men dıagnostıkalaý sharasyn ınnovatsııalar negizinde júzege asyrdy. Atalmysh ortalyqta densaýlyq saqtaý salasyndaǵy ózekti degen baǵyttar damydy. Olardyń arasynda jasýshaly tehnologııalar, kardıologııa, kardıohırýrgııa sııaqty kúrdeli salalar da bar. Aldyńǵy qatarly ǵylymı jetistikter men progressıvti tehnologııalardy densaýlyq saqtaý salasyna engizý qazirgi zamanǵy medıtsınanyń basty mindetteriniń biri. Osy turǵydan alǵanda, medıtsına salasyndaǵy halyqaralyq deńgeıdegi yntymaqtastyq pen ınnovatsııalyq jetistiktermen tájirıbe almasyp otyrýdyń mańyzy zor. Búgingi forým aıasynda medıtsına ǵylymynyń damýy men azamattardyń densaýlyqtaryn nyǵaıtýǵa yqpal etetin nátiıjeli pikirtalas bolady degen oıdamyn. Halyqaralyq kongrestiń qatysýshylarynyń barlyǵyna jáne Ulttyq ǵylymı medıtsınalyq ortalyq ujymyna sáttilik tileımin»,-delingen Elbasynyń quttyqtaýynda.
