Memleket basshysy Úkimetke Ulttyq qordan bólinetin ekinshi transhtyq qarajatty paıdalaný joldaryn ázirleýdi tapsyrdy
ASTANA. QazAqparat - Búgin Aqordada ótip jatqan Úkimettiń keńeıtilgen otyrysynda Prezıdent N. Nazarbaev Úkimetke 2015 jyly Ulttyq qordan ekinshi transh boıynsha bólinetin 500 mlrd. teńgege qatysty naqty usynystar ázirleýdi tapsyrdy.
«Ekonomıkany yntalandyrý maqsatynda 2014-2015 jyldarǵa Ulttyq qordan 1 trln. teńge bólý týraly sheshim qabyldanǵany belgili. Olardyń ishinde shaǵyn jáne orta bıznesti nesıelendirýge 100 mlrd teńge bólinedi. Bul artyq qarajat bolǵandyqtan emes, konıýktýraǵa, jaǵdaıǵa baılanysty bólinip jatyr. Biz ekonomıka ósimin tejemeý úshin bólip jatyrmyz», - dedi N. Nazarbaev.
Bul rette Elbasy bankterdi saýyqtyrýǵa 250 mlrd. teńge bólinetinin, al ındýstrııalyq-ınnovatsııalyq jumystardy júzege asyrýǵa 150 mıllıard teńge bólinetinin eske saldy.
«Halyqaralyq qarjy ınstıtýttarymen jalpy somasy 7 mıllıard dollardy quraıtyn kelisimder jasaldy. Bul - asa mańyzdy másele. Sondyqtan da, Úkimetke aǵymdaǵy jyldyń birinshi qyrkúıegine deıin 2015 jyly transhtyń ekinshi bóligin ashýǵa qatysty naqty usynystar ázirleýdi tapsyramyn. Ol boıynsha 500 mıllıardty paıdalaný joldaryn bilýge tıispiz», - dedi Elbasy.
