Memleket basshysy Úkimetke halyqty jumyspen qamtýdyń jańa baǵdarlamasyn jasaýdy tapsyrdy
ASTANA. 28 qańtar. QazAqparat /Aıdar Ospanalıev / - Memleket basshysy Nursultan Nazarbaev Úkimetke oblys jáne Astana men Almaty qalalarynyń ákimderimen birlese otyryp aǵymdaǵy jyldyń 1 mamyryna deıin halyqty jumyspen qamtýdyń jańa baǵdarlamasyn jasaýdy tapsyrdy.
Elbasy bul tapsyrmany búgin Parlament palatalarynyń birlesken otyrysynda Qazaqstan halqyna arnaǵan Joldaýynda berdi.
«Biz daǵdarysqa qarsy kúres baǵytyndaǵy «Jol kartasy» baǵdarlamasynyń aıasynda eki jylda turǵyndardy jumyspen qamtyp, eldegi jumyssyzdyqty qysqartyp, qalalar men aýyldardaǵy ınfraqurylymdardy jetildirdik. Bul daǵdarysqa qaramastan júzege asyrylǵan sharalar. Biz qolǵa alǵan baǵdarlamalar turǵyndar tarapynan úlken qoldaýǵa ıe boldy. 600 myń adam jumyspen qamtylyp, 150 myń azamat jańa mamandyq ıesi atandy», - dedi Prezıdent.
