Memleket basshysy Úkimet jumysy qalaı baǵalanatynyn aıtty

Bul týraly Tótenshe jaǵdaı rejımin qamtamasyz etý jónindegi memlekettik komıssııanyń qorytyndy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Birinshi - qazaqstandyq ekonomıkanyń óz-ózine jetkiliktiligin arttyrý. Bul úshin qolda bar shıkizattyń bazalyq qýatynyń negizinde ónerkásipte jańa qaıta óńdeýdi damytý qajet. Bizge qazaqstandyq ekonomıkanyń bolashaqtaǵy qurylymynna jańasha kózqaraspen qaraýǵa týra keledi. Onyń árbir basty «sektorynyń rólin aıqyndaý qajet: Ónerkásiptik, energetıkalyq, aýyl sharýashylyǵy, servıstik. Basqasha aıtar bolsaq, shuǵyl arada ekonomıkanyń jańa qurylymyn qalyptastyrý kerek», - dedi Qasym-Jomart Toqaev.

QR Prezıdentiniń atap ótýinshe, energetıkalyq sektor aıtarlyqtaı reformany talap etedi. Daǵdarystan keıin ol burynǵydaı bolmaq emes. Ortasha merzimdi kezeńde «jasyl energetıka» baǵytyna qaraı ilgerileý - asa qajettilik.

«Indýstrııalandyrýǵa qatysty da bizdiń ádisterimizdi qaıta qarap shyǵý qajet bolady. Eksporttyq jáne ishki naryqtyń shynaıy múmkindikterin aıqyndap, qol jetkiziletin maqsattar men quraldardy belgilep, ilgeri júrý kerek», - dedi Prezıdent.

Memleket basshysynyń atap ótýinshe, memlekettik satyp alýlar men kvazımemlekettik sektordaǵy satyp alýlardy saýatty paıdalanýdy ekonomıkalyq belsendilikti qalpyna keltirýdiń quraly retinde qarastyrý qajet. Bul rette otandyq taýar óndirýshilerdi qoldaýǵa baǵyttalǵan memlekettik satyp alýlardyń aıryqsha tártibi osy jyldyń tamyzyna deıin qoldanysta bolady. Otandyq materıaldar men qural-jabdyqtardy barynsha paıdalaný bıznesti damytýdyń basymdyqty sharty retinde belgilenedi.

«Infraqurylymdyq baǵdarlamalar boıynsha qazirgi ornalasý deńgeıin 40-tan 60-70 paıyzǵa deıin arttyrý kerek. Úkimettiń, ákimderdiń, kvazımemlekettik kompanııa basshylarynyń jumysyn baǵalaý negizinen osy kórsetkishterge baılanysty bolady», dedi Qasym-Jomart Toqaev.