Memleket basshysy: Úkimet volonterlerge naqty qoldaý sharalaryn qabyldaıdy
«Volonterler kún saıyn mańyzdy ári aýqymdy jumys atqaryp keledi. Sol arqyly Qazaqstannyń ósip-órkendeýine úles qosasyzdar. Elimizdiń ár óńirinde volonter bolýǵa nıetti azamattardyń kóp ekenine senimdimin. Úkimet olarǵa qoldaý kórsetý úshin naqty sharalardy qabyldaıdy. Biz buǵan zor mán beremiz», - dedi Prezıdent elordadaǵy «Birgemiz» respýblıkalyq front-keńsesiniń ashylý saltanatynda.
Qasym-Jomart Toqaev óz sózinde volonterlik – kezekti naýqan emes ekenin atap ótti.
«Osyny halyqqa túsindirýimiz kerek. Eriktilik – el men qoǵam úshin adal qyzmet. Volonterlik – halqymyzdyń ómir saltyna aınalýy qajet. Ony táýelsiz Qazaqstannyń búgingi jáne bolashaq sıpaty retinde dáripteýimiz kerek. Eriktilerdiń boıyndaǵy qaırat-jiger – ár azamatty yntalandyrýy tıis. Elimizdegi ár aýyl-aımaq osy mańyzdy jumystan tys qalmaıdy dep senemin. Bul, eń aldymen, órkenıetti eldiń jáne zor jaýapkershiliktiń belgisi. Ǵulama Abaı «Adamzattyń bárin súı baýyrym dep» barshamyzǵa ósıet qaldyrdy», - dedi Memleket basshysy.
QR Prezıdenttiń aıtýynsha, volonter bolý – júrektiń isi, ıaǵnı shynaıy nıettiń kórinisi.
«Sender qolǵa alǵan jumystardyń bári dál osyndaı meıirimdiliktiń jarqyn úlgisi bolaryna kúmánim joq. Men Volonter jylynda eń aldymen, elimizdiń jastaryna zor senim artamyn. Árdaıym abyroıly ári tabysty bolyńyzdar. Bárimiz birge bolaıyq», - dedi ol.
Aıta ketsek, búgin Prezıdent Qasym-Jomart Toqaev elordada EKSPO kórmesiniń «Art Hub» pavılonynda ornalasqan volonterlerdiń «Birgemiz» respýblıkalyq front-keńsesiniń ashylý saltanatyna qatysty. Front-keńse búkil Qazaqstannyń volonterleri úshin keńes berý, ádistemelik, oqytý jáne aqparattyq ortalyqqa aınalatyn bolady. Sondaı-aq, ol volonterlik jobalar men oqytý baǵdarlamalaryn úılestirý, monıtorıng jasaý, volonterlikti ilgeriletý boıynsha biryńǵaı aqparattyq saıasatty júrgizedi jáne biryńǵaı Call-ortalyqtyń jumysyn uıymdastyrady.
