Memleket basshysy Úkimet pen «Samuryq-Qazyna» Qoryna Nazarbaev Ýnıversıtet aınalasynda joǵary tehnologııalyq-ǵylymı óndiristerdi shoǵyrlandyrý boıynsha naqty josparlar ázirleýdi júktedi
ASTANA. 5 qyrkúıek. QazAqparat - Búgin Astanadaǵy Nazarbaev Ýnıversıtetinde «Qazaqstan bilim qoǵamy jolynda» taqyrybynda ınteraktıvti dáris oqý barysynda Memleket basshysy Nursultan Nazarbaev Úkimet pen «Samuryq-Qazyna» Qoryna Ýnıversıtet aınalasynda joǵary tehnologııalyq-ǵylymı óndiristerdi shoǵyrlandyrý boıynsha naqty josparlar ázirleýdi júktedi.
«Nazarbaev Ýnıversıteti ıntellektýaldy-ınnovatsııalyq klasterge aınalýy tıis. Bul úshin ne isteý kerek? Birinshiden, halyqaralyq tájirıbelerdi eskere otyryp, ýnıversıtet aınalasynan arnaıy ekonomıkalyq aımaqtar qurýdy qarastyrýymyz kerek. Ekinshiden, ındýstrııalyq-joǵary tehnologııalyq alańdar qurý jumysyn belsendi ete túsý qajet. Ulttyq kompanııalar, «QazAtomÓnerkásip» pen «QazǴarysh» ýnıversıtet janynan qazirdiń ózinde ǵylymı-óndiristik ortalyqtar salýda», - dedi N. Nazarbaev. Osyǵan oraı, Memleket basshysy Úkimet pen «Samuryq-Qazyna» Qoryna Ýnıversıtet aınalasynda joǵary tehnologııalyq-ǵylymı óndiristerdi, ulttyq kompanııalardyń salalyq-zertteý ınstıtýttaryn shoǵyrlandyrý boıynsha naqty josparlar ázirleýdi júktedi.
«Qazaqstanda qyzmet etip jatqan sheteldik kompanııalar da budan syrt qalmaýy tıis», - dedi N. Nazarbaev.
