Memleket basshysy tutynýshylar quqyǵyn qorǵaý qyzmetin retke keltirýdi tapsyrdy

ASTANA. QazAqparat - Memleket basshysy Nursultan Nazarbaev QR Premer-Mınıstri Baqytjan Saǵyntaevqa QR UEM Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti qyzmetin tekserýdi tapsyrdy. Bul tapsyrmany Prezıdent Aqordada Qaýipsizdik keńesiniń otyrysynda júktedi, dep habarlaıdy QazAqparat.

«Osy jumystarmen aınalysýy tıis ókiletti organdar áreketsizdikti kórsetýde jáne tarıfti qalyptastyrý salasyndaǵy tártipsizdikke enjarlyq tanytýda. Eshkim de baqylaý jasap jatqan joq.

Bárinen buryn osy máselege Ulttyq ekonomıka mınıstrligi tıisti deńgeıde nazar aýdarmaýda, oǵan baǵynyshty monopolııaǵa qarsy vedomstvo ókilderi óz jumystaryn eńsere almaı jatyr.

Monopolııaǵa qarsy komıtet árdaıym ustanymdylyq tanytyp, tutynýshylar quqyǵyn qorǵaýǵa ekpin qoıýy tıis. Premer-Mınıstrge atalǵan komıtet qyzmetin retteýdi tapsyramyn. Bul turǵyda barlyq óńirlik monopolııaǵa qarsy vedomstvolar deńgeıinde jumys tıimdiligine baǵa berý qajet», - dedi Prezıdent.

Budan buryn habarlanǵandaı, jaqynda QR Bas prokýrory Qaırat Qojamjarov kommýnaldyq tarıfter salasyna júrgizilgen tekserýdiń nátıjesin jarııalady.

«Bul turǵyda kóptegen qarjylyq buzýshylyqtar anyqtaldy. Monopolıster tarapynan ózindik shyǵyndaryn qasaqana kóterý jáne 29 mlrd teńge somasynda olardyń kúmándi kelisimderi belgili boldy», - dedi Bas prokýror. Osy oraıda ol tarıf quramynda qyzmetkerlerge arnalǵan bonýstar men syılyqaqylar negizsiz qamtylyp otyrǵanyn atap ótti.

Budan bólek, shyǵystardy arttyrý maqsatynda ádeıi túrli úlestes kásiporyndar, onyń ishinde joǵary baǵamen jóndeý jumystaryn júrgizýge ári jabdyqtar satyp alýǵa servıstik kompanııalar qurylǵan.