Memleket basshysy túrki elderine ІT-kompanııalardyń yntymaqtastyǵyn kúsheıtýdi usyndy

NUR-SULTAN. QazAqparat – QR Prezıdenti Qasym-Jomart Toqaev aqyldy qala júıesin qurý isindegi tsıfrlyq jetistikter boıynsha pikir bildirdi, dep habarlaıdy QazAqparat tilshisi.

«Qazir álem halqynyń sany 8 mıllıardqa jýyqtady. Onyń 55 paıyzy qalada turady. Birikken Ulttar Uıymynyń boljamy boıynsha 2050 jylǵa qaraı jer betindegi qala halqynyń úlesi 68 paıyzǵa jetedi. Jyl ótken saıyn qalalyq jerde kórsetiletin qyzmetke suranys artyp keledi», - dedi Qasym-Jomart Toqaev Túrki memleketteri uıymynyń sammıtinde.

Osy oraıda Memleket basshysy jahandyq indet mundaı qyzmetti qashyqtan júrgizýge bolatynyn kórsetkeinin atap ótti.

«Qazaqstanda aqyldy qala júıesi engizilip, birqatar joba tabysty júzege asyrylýda. Sonyń arqasynda jol-kólik oqıǵalary men apat saldarynan bolatyn ólim-jitim 60 paıyzǵa azaıdy. Qoǵamdyq oryndarda jasalǵan qylmys sany 70 paıyzǵa kemidi. Al, salyq túsimi birneshe ese artty. Qazaqstan Tsıfrlandyrý jónindegi ulttyq jobany qabyldady. Bul joba qalalardy basqarý isine ozyq tehnologııa engizýdi kózdeıdi. Aqyldy qala jobalary aıasynda ІT-kompanııalardyń yntymaqtastyǵyn kúsheıte túsýimiz kerek. Bul bizdiń elderimizdiń ekonomıkasyn órkendetýge de septigin tıgizeri anyq. Qazaqstan aqyldy qala júıesin qurý isindegi tsıfrlyq jetistikterin eksporttaýǵa jáne tájirıbe bólisýge daıyn», - dedi Prezıdent.

Budan buryn habarlanǵandaı, «Túrkitildes memleketterdiń yntymaqtastyq keńesi» endi «Túrki memleketteri uıymy» dep ataldy.