Memleket basshysy turaqty túrde tańerteń Astanany aralaıtynyn aıtty
ASTANA. QazAqparat - QR Prezıdenti Nursultan Nazarbaev endi turaqty túrde tańerteń Astana aýmaǵyn aralaıtyndyǵyn aıtty, dep habarlaıdy QazAqparat.
«Qalanyń jaqsy meri tańerteń saǵat besten turyp, óziniń orynbasarlarymen jáne apparatymen qalany aralap kelgennen keıin, jumysqa baryp: «Qazir Prezıdent kelgenshe, barlyq kemshilikterdi joıý qajet», dep aıtady. Eger de osyny istegiń kelmese, endi ózim EKSPO-ǵa deıin tańerteń aldymen qalany aralap, jumysqa keletin bolamyn. Bul eskertý barlyq qalalar men oblys ortalyqtaryna qatysty. Shahar basshysy qaladaǵy jaǵdaıdy tolyq bilýi tıis»,-dedi Elbasy «EKSPO-2017» kórmesine daıyndyq barysyna jáne Astanany damytýǵa arnalǵan keńeste.
Osy oraıda Memleket basshysy tozyǵy jetken ǵımarattar men úılerdiń qasbeti týraly aıta kele, joldar men jaıaý júrginshiler jolaqtary, jaryqtandyrý júıesi problemalaryna toqtaldy.
«Bizdiń keıbir úılerimizdiń qasbetine qarańyzdar. Prezıdenttiń kóz aldynda turǵan úılerdiń qasbeti, adam júretin joldarda taqtaıshalar túsip qalǵan, buzylyp, jupyny tartqan. Úı ıeleri buny retke keltirmeıdi, sebebi eshkim talap etip jatqan joq. Bizde qys uzaq, qysta qalada jasyl-jelek bolmaıdy, elordany tek ádemi nysandar kórkeıtip turady. Menińshe kók, sary, aq túster bizdiń qalamyzǵa jaqsy jarasady»,-dep atap ótti Nazarbaev.
Budan buryn habarlaǵanymyzdaı , Prezıdent Astananyń ortalyǵyndaǵy eski úılerdi buzýdy tapsyrdy.
Sonymen qatar keńes barysynda Memleket basshysy Prezıdent elorda ákimine qala qurylysy boıynsha usynys engizýdi júktedi .
