Memleket basshysy táýelsizdik jyldary el damýynyń 4 negizgi baǵytyn tamasha júrgize bildi – E. Ertisbaev
ASTANA. 28 qańtar. QazAqparat /Qanat Mámetqazyuly/ - Memleket basshysy Nursultan Nazarbaev táýelsizdik jyldary el damýynyń 4 negizgi baǵytyn aıqyndap, ony óziniń basshylyǵymen tamasha júrgize bildi.
Búgin QR Parlamenti palatalarynyń birlesken otyrysynda Memleket Basshysy Nursultan Nazarbaevtyń Qazaqstan halqyna Joldaýy jarııalanǵannan keıin QazAqparat tilshisine suhbat bergen QR Prezıdentiniń keńesshisi Ermuhamet Ertisbaev osylaı málim etti.
«Joldaýda Prezıdent Qazaqstannyń strategııalyq damý vektorynyń jaqyn aralyqtaǵy 10 jyly boıynsha baǵyttardy aıqyndap berdi ári táýelsizdiktiń 20 jyldyǵynyń aldyn ala qorytyndylaryn jasady. Elbasy el damýyna serpin bergen negizgi irgeli 4 baǵytqa erekshe toqtaldy. Birinshi - bul erkindik. Rasynda da, táýelsizdiktiń alǵashqy jylynan bastap eldiń saıası ekonomıkalyq erekindigi naqty júzege asty. Árıne, ekonomıkalyq erkindik saıası jańǵyrtýdan ústem boldy. Elbasy «aldymen ekonomıka» saıasatyn eshýaqytta jasyrǵan emes. Bul óz jemisin berdi, áli de beredi. Elbasy toqtalǵan ekinshi másele - birlik. Qazaqstan basqa elderge qaraǵanda birlikti saqtady. Bul halyqtar birligimen qosa eldegi saıası kúshterdiń birligin de kórsetedi. Sonyń arqasynda elimizde TMD sheńberinde eń tabysty naryqtyq reformalar júzege asty. Úshinshi másele - eldiń gúldenýi. Eger áleýmettik-ekonomıkalyq damýdyń barlyq parametrlerin alyp qarasaq, jańarý úderisine árkim tańdanatyn edi. Tórtinshiden - turaqtylyq. Bul turaqtylyqsyq Qazaqstan eshqandaı ózgeris jasap, jańǵyra almas edi. Sondyqtan da, buǵan árkim qýanýy, maqtanýy kerek», - dedi E. Ertisbaev.
