Memleket basshysy tarıf saıasatyn túbegeıli qaıta qaraýdy usyndy

ASTANA. QazAqparat – Prezıdent Qasym-Jomart Toqaev elimizde tarıf saıasatyn qaıta qarap, monopolısterge jaýapkershilikti kúsheıtý kerektigin aıtty, dep habarlaıdy QazAqparat tilshisi.

«Tarıf saıasatyn túbegeıli qaıta qaraý, tarıf belgileýdiń jańa ádistemesin engizý jáne ınvestorlardyń qyzyǵýshylyǵyn arttyrý qajet. Tabıǵı monopolııa sýbektileriniń bárine 5-7 jylǵa deıin kóńilge qonymdy naryqtyq tarıf engizgen jón, ıaǵnı baǵa turaqty bolsa, ınvestıtsııany naqty josparlaýǵa múmkindik týady», - dedi Qasym-Jomart Toqaev Qazaqstan halqyna Joldaýynda.

Prezıdenttiń aıtýynsha, qarjy uıymdary da kásiporyndarǵa nyq senimmen nesıe bere alady.

«Sonymen qatar, monopolısterdiń jaýapkershiligin edáýir arttyrý qajet. Bul salaǵa tsıfrlyq baqylaý tásilderi engiziledi. Sol arqyly azamattarymyz tarıftik smeta jáne ınvestıtsııalyq baǵdarlamalar týraly aqparat alady», - deıdi Memleket basshysy.