Memleket basshysy tarazdyq soǵys ardagerin quttyqtady

TARAZ. QazAqparat – Jambyl oblysynyń ákimi Berdibek Saparbaev Uly Otan soǵysynyń ardageri, Jambyl oblysy men Taraz qalasynyń qurmetti azamaty Tileýqabyl Tórebekovti 95 jyldyq mereıtoıymen quttyqtap baryp, el Prezıdenti Qasym-Jomart Toqaevtyń quttyqtaý hatyn tapsyrdy, dep habarlaıdy QazAqparat oblys ákiminiń baspasóz qyzmetine silteme jasap.

Jambyl oblysynda Tileýqabyl Tórebekov týraly bilmeıtin adam kemde-kem.

Keńes áskeriniń qatarynda mılıtarıstik Japonııamen soǵysqan erjúrek maıdanger T. Tórebekov soǵys aıaqtalǵan soń barlyq kúsh-jigerin Jambyl oblysynyń damýyna arnady. 1950-1966 jyldar aralyǵynda ol oblystyq partııa komıtetiniń birinshi hatshysynyń kómekshisi, bólim meńgerýshisi bolyp jumys istedi. Jambyl qalalyq partııa komıtetiniń ekinshi hatshysy, 1970 jyldan 1983 jylǵa deıin Jambyl qalalyq atqarý komıtetiniń tóraǵasy qyzmetin atqardy. Tileýkabyl Tórebekuly qurmetti demalysqa shyqqanda da qoǵamdyq jumystan tys qalǵan joq. Uzaq jyldar boıy oblystyq Ardagerler keńesin basqardy.

Ol ІІІ dárejeli Dańq, ІІ dárejeli Otan soǵysy, Eńbek Qyzyl Tý, «Qurmet belgisi» ordenderimen, 13 medalmen, onyń ishinde «Erligi úshin» medalimen marapattalǵan. Alty bala tárbıelep ósirgen.

Qazaqstan Respýblıkasynyń Prezıdenti Qasym-Jomart Toqaev óz hatynda aǵa urpaq - T. Tórebekov sııaqty tulǵalardyń ómir joly búgingi urpaq úshin úlgi - ónege bolyp tabylatynyn atap ótken.

Qarııamen áńgime barysynda Berdibek Saparbaev eńbek sińgen ardagerdiń óńirdiń áleýmettik-ekonomıkalyq damýyna qosqan zor úlesin, onyń uıymdastyrýshylyq qabiletin jáne biliktilik qasıetterin tilge tıek etti.

Óńir basshysy ardagerge bir mıllıon teńgegelik sertıfıkat tabys etti.