Memleket basshysy Taldyqorǵandaǵy Oqýshylar saraıyna avtobýs tartý etti
ASTANA. QazAqparat - Qazaqstan Prezıdenti Nursultan Nazarbaev Almaty oblysyna jumys sapary barysynda Taldyqorǵan qalasyndaǵy Oqýshylar saraıynda boldy, dep habarlaıdy Aqordanyń baspasóz qyzmeti.
Memleket basshysy bıologııa, fızıka kabınetterin, tehnıkalyq shyǵarmashylyq modelderi kórmesin, horeografııa zalyn, úlken kontsert zalyn aralap kórip, kórkemóner galereıasyndaǵy sýretter ekspozıtsııasymen tanysty.
Elbasy nazaryna án jáne bı óneri boıynsha balalardyń kontserttik nómirleri usynyldy.
Budan bólek, Nursultan Nazarbaev Oqýshylar saraıyna keletin balalarmen jáne olardyń ata-analarymen áńgimelesip, shyǵarmashylyq tabys pen baq-bereke tiledi. Sońynda Memleket basshysy Oqýshylar saraıyna jaıly avtobýs tartý etti.
Ǵımarattyń jalpy alańy - 13 myń sharshy metrden astam. Mekeme ınfraqurylymy sheberhana, zerthana, kórme jáne májilis zaldaryn, sondaı-aq mýzeı, medıateka, dybys jazý stýdııasy men observatorııany qamtıdy.
