Memleket basshysy: Tabystar men shyǵystardyń jalpyǵa ortaq deklaratsııasy - baılar men kedeılerdi boldyrmaýǵa aparatyn jol
ASTANA. QazAqparat - Tabystar men shyǵystardyń jalpyǵa ortaq deklaratsııasy shirigen baılar men sińiri shyqqan kedeılerdi boldyrmaýǵa aparatyn jol. Bul týraly búgin Aqordada ótip jatqan Úkimettiń keńeıtilgen otyrysynda Elbasy Nursultan Nazarbaev aıtty.
«Reformalaý salyq júıesine de áser etetin bolady. Tabystar men shyǵystardyń jalpyǵa ortaq deklaratsııasyn engizgenge deıin biz múlikterdi zańdastyrýǵa múmkindik beremiz. Men birneshe márte aıttym, taǵy da aıtqym keledi. Adamdar durys túsinbedi nemese biz bul zańdy durys ázirleı almadyq nemese muny oıynshyq kórýde. Biz tabystar men shyǵystardyń jalpyǵa ortaq dekalaratsııasyna ótý kezeńinde turmyz», - dedi Elbasy.
Osy rette Memleket basshysy atalǵan bastama shirigen baılar men sińiri shyqqan kedeılerdi boldyrmaýǵa aparatyn jol ekendigin basa aıtty.
«Osylaısha biz teńestiremiz jáne barlyǵyna da nege satyp alǵanyn, nege satqandyǵyn jáne aqshany qaıdan alǵandyǵyn túsindirýine týra keledi. Sonyń aldynda biz bárin tazartqymyz keledi. Zańdastyrýdy jarııa ettik», - dedi QR Prezıdenti.
Elbasy qarjysynyń basym bóligin sheteldegi bankterde saqtaǵan azamattarǵa da aqshasyn elge ákelýleri qajettigin qadaı aıtty.
«Qyr astyndaǵy qarjylaryń qurdymǵa ketedi. Odan da Otanǵa ákelińder, osy jerde paıdalanyńdar, biz keshiremiz. Quqyq qorǵaý organdary tarabynan esh qýdalaý bolmaıdy», - dedi N.Nazarbaev.
