Memleket basshysy sybaılas jemqorlyqqa qarsy is-qımyl jóninde keńes ótkizdi
Jıyndy ashqan Memleket basshysy óz Jarlyǵyna sáıkes Alık Shpekbaevtyń Sybaılas jemqorlyqqa qarsy is-qımyl agenttiginiń tóraǵasy laýazymynan bosatylýyna baılanysty túsindirme jasady.
– Agenttikte onyń basshylyǵymen jemqorlyqpen kúreste aýqymdy jumys atqaryldy. Osy qurylymnyń qyzmeti aıtarlyqtaı jańǵyrdy. Jemqorlyqqa qarsy birqatar jobalar men bastamalar qolǵa alyndy. Solardyń qatarynda «ADALDYQ ALANY», «ANTIKOR ORTALYGY», «ADAL BILIM» jáne taǵy basqalary bar. Alık Jatqambaıulyna osy qyzmettegi tabysty jumysy úshin alǵys aıtamyn, – dedi Prezıdent.
Sonymen qatar Qasym-Jomart Toqaev Sybaılas jemqorlyqqa qarsy is-qımyl agenttiginiń tóraǵasy laýazymyna Marat Ahmetjanovtyń taǵaıyndalǵanyn jetkizdi.
– Marat Ahmetjanov Ádilet mınıstrliginde, Bas prokýratýrada basshylyq laýazymdardy atqardy. Kezinde Ekonomıkalyq qylmysqa jáne sybaılas jemqorlyqqa qarsy kúres agenttiginiń orynbasary boldy. Sondyqtan men ony osy laýazymǵa taǵaıyndaý týraly sheshim qabyldadym, – dedi Memleket basshysy.
Prezıdent memlekettiń qaýipsizdigi men halyqtyń ál-aýqaty sybaılas jemqorlyqpen kúres jónindegi júıeli sharalarǵa tikeleı baılanysty ekenin aıtty.
Osyǵan oraı Qasym-Jomart Toqaev Agenttikke birqatar mańyzdy mindet júktedi. Ásirese, Memleket basshysy sybaılas jemqorlyqqa qarsy is-qımyldy barlyq deńgeıde tıimdi júrgizý úshin keshendi jumys atqarý qajet ekenine nazar aýdardy. Osy rette qabyldanǵan sharalar qylmystyq qýdalaý áreketimen ǵana shektelmeýi kerek.
– Memlekettik apparat sheshim qabyldaýdan tartynyp, bıýrokratııaǵa boı aldyrady jáne laýazymdy tulǵalar jeke jaýapkershilik alýdan jaltarady. Agenttik jumys barysynda jiberiletin qatelikterdi qasaqana jasalǵan qylmystardan ajyrata bilýge tıis. Sondaı-aq, kináli adamdy qylmystyń barlyq quramy bolǵan kezde ǵana jaýapqa tartýy qajet, – dedi Qasym-Jomart Toqaev.
Memleket basshysy qoǵam ókilderiniń belsene atsalysýy jáne aldyn alý sharalary sybaılas jemqorlyqqa qarsy kúrestiń basty quraldary ekenin atap ótti.
Prezıdent óziniń tapsyrmasy boıynsha «Qoǵamdyq baqylaý týraly» zań daıyndalyp jatqanyn habarlady. Bul qujat memlekettik organdardyń qoǵam aldyndaǵy ashyqtyǵy men eseptiligin qamtamasyz etýdi kózdeıdi. Sondaı-aq belsendi azamattardyń quqyqtyq baqylaý quraldaryn paıdalanýyna múmkindik beredi.
Memleket basshysy «follow the money» qaǵıdatynyń áleýetine toqtalyp, qylmystyq jolmen alynǵan múlikti izdestirý jáne tárkileý isine basa mán berýdi tapsyrdy. Qasym-Jomart Toqaev qylmystyq jolmen alynǵan dúnıe-múlikti tárkileý jónindegi buljymas qaǵıdat sybaılas jemqorlyqqa qatysty kez kelgen is-árekettiń aldyn alýǵa septigin tıgizýi tıis dep sanaıdy. Memleket basshysynyń aıtýynsha, Agenttik bul jumysty qarjy monıtorıngi organdarymen birlesip uıymdastyrýy qajet.
– Meniń tapsyrmam boıynsha qylmystyq protsestiń úsh býyndy modeli engizilip jatyr. Mundaı model aıyptaýshylyq ustanymdy báseńdetip, qylmystyq protseske zańsyz aralasýdy boldyrmaıdy. Agenttikke óz qyzmetin qylmystyq protsestiń úsh býyndy modeline beıimdeýdi tapsyramyn, – dedi Prezıdent.
Jıyn sońynda Memleket basshysy qoǵam, bıznes jáne ınvestorlar ózderin sybaılas jemqorlyq qysymynan saqtaıtyn myqty qorǵan bar ekenin sezinýi qajettigin atap ótip, jańa tóraǵa Agenttik jumysynyń tıimdiligin odan ári arttyra túsetinine senim bildirdi.