Memleket basshysy ShYU-daǵy seriktesterdi jańa múmkindikterdi paıdalanýǵa shaqyrdy
Ekonomıkalyq yntymaqtastyqtyń basym baǵyttary sanalatyn tranzıttik-kólik sektory, azyq-túlik jáne energetıkalyq qaýipsizdik máselelerine arnaıy toqtalǵym keledi.
«ShYU elderiniń tıimdi ekonomıkalyq jáne kólik dálizderin damytý jónindegi Yntymaqtastyq tujyrymdamasynyń qabyldanýy ózara logıstıkalyq baılanysty jaqsartýdaǵy mańyzdy jetistik boldy. Áńgime «Qytaı – Eýropa» baǵyty jáne Transkaspıı halyqaralyq kólik baǵyty boıynsha temirjol tasymaly, sondaı-aq Qazaqstan men Qytaı shekarasynda úshinshi temirjol ótkeliniń qurylysyn salý jospary týraly bolyp otyr.
Osyǵan oraı, men ShYU-daǵy seriktesterdi jańa múmkindikterdi paıdalanýǵa shaqyramyn.
Shyǵys Azııadan Parsy shyǵanaǵy elderine eń qysqa jol sanalatyn «Qazaqstan-Túrikmenstan-Iran» temir jolynyń áleýeti zor.
Qazaqstan men Ortalyq Azııa memleketteri arasyndaǵy tranzıttik-kólik yntymaqtastyǵy qarqyndy damyp keledi. Óńirimizdegi elderdiń ózara baılanysyn qamtamasyz etýge baǵyttalǵan perspektıvti jobalardyń júzege asyrylýyn quptaımyz.
Biz Ortalyq jáne Ońtústik Azııa arasyndaǵy kólik baǵyttaryn keńeıtý, «Soltústik-Ońtústik» jáne «Shyǵys-Batys» transeýrazııalyq dálizderin damytý jónindegi is-áreketterdi qoldaımyz. Jalpy, biz jańa mýltımodaldy kólik dálizderi men logıstıkalyq ortalyqtar ashýdy jáne qoldanystaǵylaryn jańǵyrtýdy quptaımyz», - dedi QR Prezıdenti.
Foto: mobillegends.net